Թուրքիան Ադրբեջանին առաջարկել է հաշվարկներն իրականացնել ազգային արժույթներով

Բաքուն և Անկարան պետք է ձգտեն ստորագրել ազատ առևտրի համաձայնագիր և ազատականացնեն առևտուրը, ինչպես նաև ազգային արժույթներով հաշվարկներ կատարեն: Այս մասին հայտարարել է Թուրքիայի առևտրի նախարար Ռուհսար Փեքջանը, գրում է minval.az կայքը:

«Մեր նպատակը պետք է լինի ազատ առևտրի համաձայնագիրը: Ադրբեջանի հետ արտոնյալ առևտրային պայմանագրին ենթակա ապրանքների ցանկն այնքան սահմանափակ է, որ չի համապատասխանում երկու երկրների հարաբերություններին: Ներկայում մենք աշխատում ենք ավելի քան 150 տարբեր ապրանքների ցուցակի վրա: Սակայն միասնական շուկայի գաղափարի համար Ադրբեջանի հետ ազատ առևտրի համաձայնագիրը մեզ համար ավելի հարմար է»,-ասել է Փեքջանը Բաքվում Ադրբեջանի կառավարության տնտեսական բլոկի նախարարների հետ հանդիպմանը:

Թուրք նախարարը հավելել է, որ երկու երկրի միջև առևտրատնտեսական հարաբերությունների զարգացման ուղղությամբ աշխատանքները կշարունակվեն:

«Մենք պետք է խոսենք ոչ թե ապրանքների ցուցակների, այլ մեր առևտրի ազատականացման մասին: Իրականացնելու համար երկու երկրների նախագահների կողմից մեր առջև դրված խնդիրը, այն է` ապրանքաշրջանառությունը տարեկան 15 միլիարդ դոլարի հասցնելը, պետք է վերացնենք առևտրի փոխադարձ խոչընդոտները և հաշվարկներում ավելի մեծ ուշադրություն դարձնենք տեղական արժույթներով առևտրային գործառությունների վրա»,-ընդգծել է Փեքջանը:

Նախարարը նշել է նաև «երկու երկրների միջև հարաբերություններում ներդրումների մեծ կարևորությունը» և հայտնել է թուրքական կողմի պատրաստակամությունը Լեռնային Ղարաբաղում ենթակառուցվածքների և այլ աշխատանքների ոլորտում բոլոր տեսակի համագործակցության համար: