Ենթակառուցվածքների բացման շուրջ քննարկումների ակտիվությունը ցույց է տալիս, որ կողմերը հանգրվանի են մոտենում. Աննա Կարապետյան (տեսանյութ)
Ենթակառուցվածքների բացման շուրջ քննարկումների ակտիվությունը ցույց է տալիս, որ կողմերը, կարծես, մոտենում են որոշակի պայմանավորվածությունների ամրագրման հանգրավանին, ինչը մի շարք հարցեր և մտավախություններ է առաջացնում: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. Երկրագունդ» խորագրի ներքո ասել է «Հայացք» վերլուծական կենտրոնի տնօրեն Աննա Կարապետյանը:
«Այս շաբաթը քննարկումների տեսանկյունից շատ ակտիվ շաբաթ էր, և օրակարգում հիմնականը ենթակառուցվածքները բացելու հարցն է, հարակից քննարկվում են նաև Արցախյան հակամարտությանը վերաբերող այլ հարցեր»,- ասել է նա:
Փորձագետը հիշեցրել է, որ շաբաթվա սկզբին տեղի ունեցավ ԱԽ նիստ, որի հիմնական հարցը ենթակառուցվածքների բացումն էր, այնուհետև եղան ակտիվ երկկողմ շփումներ՝ ՌԴ փոխվարչապետի այց Ադրբեջան, որին հաջորդեց Ալիև-Պուտին հեռախոսազրույց, այնուհետև ՌԴ փոխվարչապետն այցելեց Երևան, երեկ տեղի ունեցավ ՌԴ արտգործնախարարի երկու հանդիպում Հայաստանի և Ադրբեջանի արտգործնախարարների հետ առանձին-առանձին, այսօր արդեն հայտարարվեց, որ ապրիլի 7-ին սպասվում է Նիկոլ Փաշինյանի այցը Մոսկվա և հանդիպումը Վլադիմիր Պուտինի հետ: Դրան զուգահեռ տեղի ունեցավ հեռախոսազրույց Հայաստանի ԶՈՒ ԳՇ պետի և Ռուսաստանի ԶՈՒ ԳՇ պետի միջև, ինչպես նաև Երևան այցելեց Արցախում ռուսական խաղաղապահ առաքելության ղեկավար Ռուստամ Մուրադովը:
«Մենք տեսնում ենք, որ շատ ակտիվ քննարկումներ են տեղի ունենում Ռուսաստանի միջնորդությամբ՝ Ռուսաստան-Հայաստանի, Ռուսաստան-Ադրբեջան և հիմնական օրակարգային հարցը ենթակառուցվածքները բացելն է»,- նշել է Կարապետյանը:
Այս համատեքստում փորձագետն անդրադարձավ նաև Թյուրքալեզու երկրների համագործակցության խորհրդի ոչ ֆորմալ գագաթաժողովին Ադրբեջանի նախագահ Իլհամ Ալիևի ելույթին, որում նա, այդ թվում նշել էր, որ արդեն հինգ հանդիպում է տեղի ունեցել փոխվարչապետների հանձնաժողովի ձևաչափով և կան արդյունքներ:
«Ալիևի խոսքերում կարելի է նաև թաքնված սպառնալիք տեսնել՝ չլինեն ենթակառուցվածքներն Ադրբեջանը կարող է կրկին դիմել ուժի: Դրան զուգահեռ Ալիևը բաց տեքստով կրկին հավակնություններ արտահայտեց Զանգեզուրի նկատմամբ՝ ասելով, որ դա ադրբեջանական տարածք է»,- ասել է քաղաքագետը:
«Ակնհայտ է, որ Ադրբեջանն այսօր օրակարգում մեկ հիմնական թեմա ունի և դա ենթակառուցվածքները բացելու միջոցով «Զանգեզուրի միջանցքը» ստանալն է և թյուրքական աշխարհը միավորելը»,- ասել է նա:
Նա նաև ընդգծել է, որ Ալիևի հավակնությունները Զանգեզուրի նկատմամբ ցույց են տալիս, որ Ադրբեջանի նպատակը բոլորովին այդ ճանապարհներով երթևեկելը չէ: Հավակնությունը շատ ավելի մեծ է:
«Հանդիպումների ակտիվությունը հուշում է, որ գործընթացը հանգրվանային փուլ է մտնում, կարծես կողմերը մոտենում են որոշակի պայմանավորվածությունների ամրագրման: Եվ այդ համատեքստում մտահոգիչ է, թե որքանով է Հայաստանի ղեկավարությունը պաշտպանել Հայաստանի և հայ ժողովրդի շահերը»,- նշել է «Հայացք» վերլուծական կենտրոնի տնօրենը:
Մանրամասները տեսանյութում: