Արդեն 4 ամիս է ԱՀ անվտանգության խորհրդի գրասենյակի նախկին աշխատողները առանց աշխատանքի են. Բաց նամակ Արցախի նախագահին

Արդեն 4 ամիս է ԱՀ անվտանգության խորհրդի գրասենյակի նախկին աշխատողները ներիշխանական ամբիցիոզ պահանջ-որոշումների արդյունքում շարունակում են մնալ առանց աշխատանքի: Այս մասին Արցախի նախագահ Արայիկ Հարությունյանին ուղղված բաց նամակում հայտնում են ԱՀ անվտանգության խորհրդի գրասենյակի նախկին աշխատողները:

«Բաց նամակ Արցախի նախագահ Արայիկ Հարությունյանին

Հարգելի´ պարոն Հարությունյան,

2020թ. մայիսին, երբ ստանձնեցիք նախագահի պաշտոնը, երդվեցիք երաշխավորը լինել Արցախի Հանրապետության Սահմանադրությանը, օրեր անց հայտարարեցիք, որ բոլոր արցախցիների նախագահն եք, նրանց անվտանգության երաշխավորը, իսկ Արցախը դրախտ դարձնելու Ձեր խոստումների մասին լռում ենք:

Ամեն ինչ չափազանց ճշմարտանման կլիներ, եթե 2020թ. սեպտեմբերի 27-ին չպայթեր պատերազմը, չկորցնեինք մեր հայրենիքի 2/3-ը, չընդհատվեին հազարավոր կյանքեր, չհաշմվեին եռակի, քառակի ճակատագրեր, երկիրը չհայտնվեր անվտանգային, սոցիալ-տնտեսական, հոգևոր-մշակութային ճահճում: Այնուամենայնիվ, ունենք այն, ինչ ունենք, և բռաչափ հայրենիքի թշվառությունը թանկ է առավել, քան օտարության պերճանքը:

Այս հոգեբանությամբ է արցախցին վերադարձել, սակայն չի պատկերացրել, որ սոցիալական երաշխիքների խոստումներ շռայլող նախագահը կարող է հացի խնդրի առջև կանգնեցնել մի խումբ պետական ծառայողների` ետպատերազմյան Արցախում ծավալված ներքաղաքական հայտնի զարգացումների բերումով:

Հարգելի´ պարոն նախագահ,

արդեն 4 ամիս է ԱՀ անվտանգության խորհրդի գրասենյակի նախկին աշխատողները ներիշխանական ամբիցիոզ պահանջ-որոշումների արդյունքում շարունակում են մնալ առանց աշխատանքի, այնինչ անձամբ եք խոստացել յուրաքանչյուրին ապահովել համազոր աշխատանքով:

Ոչ հրապարակային խողովակներով բազմաթիվ անգամ դիմելով Ձեր աշխատակազմ և խնդրի լուծում չստանալով, մեզ այլ բան չի մնում, քան օգտվելու հրապարակային մեթոդներից: Գիտե՞ք ինչու: Որովհետև Արցախում, ինչպես համոզվում ենք, խնդիրները միայն այդ եղանակով են լուծելի դառնում. բաց նամակներ, վրանային ակցիաներ, բողոքի և անհնազանդության ցույցեր, հասարակական կարգի խախտում և, որ ամենատարածվածն է, հատկապես Ձեր անձի հրապարակային քննադատություն:

Առայժմ չհատելով կարմիր գծերն ու շարունակելով մնալ կոռեկտության շրջանակներում` պահանջում ենք լուծում տալ ԱՀ անվտանգության խորհրդի գրասենյակի մի քանի տասնյակի հասնող նախկին աշխատակիցներին աշխատանքով ապահովելու հարցին. նրանցից յուրաքանչյուրը քաղաքական էշելոննորում իշխանություն բաժանելու գործընթացի ուղիղ զոհ է»,-ասվում է բաց նամակում: