Մեր տնօրենը ոչ մի «լեվի» երեխա չի ընդունել. բողոքի ակցիա թիվ 133 մանկապարտեզում
Երևանի թիվ 133 մանկապարտեզի մոտ այսօր՝ մարտի 30-ի առավոտյան բողոքի ակցիա է տեղի ունեցել. մանկապարտեզի աշխատակիցները բողոքում էին, որ աշխատանքից ազատվել է մանկապարտեզի տնօրեն Ժաննա Մանուկյանը, որն անհետ կորածի կին է:
Մանկապարտեզի պահակը, որը զոհված զինվորի հայր է, նշեց. « Երեկ լսեցի, որ մանկապարտեզի վարիչին գործից հանել են եւ շատ վրդովվել եմ, որովհետեւ ինքս զոհվածի հայր եմ եւ շատ եմ զարմանում, որ այսպիսի մարդկանց նման ձեւով են մոտենում: Նրա ամուսնուն արդեն մի քանի ամիս փնտրում են, դուք պատկերացնո՞ւմ եք նրա վիճակը: Այս օրերին շատ պաշտոնյաներ շատ են շահարկում մեր զոհված երեխաների հարցը, ցավակցում են, խոնարհվում են մեր առջեւ: Թող նման մարդիկ մեր առաջ չխոնարհվեն: Թող խոնարհվեն այս ազգի առաջ, հայ հողի համար:
Ընկեր Ժաննան ունի 2 երեխա, եթե նրան գործից հանեցին, ինչ է լինելու նրա երեխաների հետ, ո՞վ պետք է դրա պատասխանը տա»:
Նա հավելեց, որ մանկապատեզի տնօրենը հնարավոր չէ, որ որեւէ անօրինական բան արած լիներ. «Կա՞ մի հիմնարկ, որտեղ ամեն ինչ կատարյալ է: Բոլոր տեղերում թերություններ կան, բայց թերությունն այն աստիճան չի եղել, որ նրան գործից հանեին»:
Մանկապարտեզի տնտեսվար Հասմիկ Դավթյանն էլ հավելեց. «Արդեն տարուց ավելի է, մենք այս կարգավիճակում ենք, ստուգողներն այնպես են ներս մտնում, կարծես գալիս են մեզ բռնելու: Մեր պահանջն է, որ մեր տնօրենին վերադարձնեն: Մեր տնօրենը իրենց լեզվով ասած, ոչ մի «լեւի» երեխա չի ընդունում, բայց ասում են՝ «լեւի» երեխա են պահում: Ցուցակից դուրս չեն եղել այդ երեխաները: Բոլորին ընդունել են օրենքով սահմանված կարգով, բոլոր հիմքերը կան»:
Ինչպես ավելի վաղ հայտնել էինք, որ Շենգավիթ համայնքի ղեկավար Ռազմիկ Մկրտչյանը ֆեյսբուքյան իր էջում գրել էր, թե ուսումնասիրությունների արդյունքում պարզվել է՝ մանկապարտեզի տնօրենն ըստ իր ցանկության կամ չիմացության հետևանքով ընտրել և ընդունել է որևէ արտահերթություն չունեցող 12 երեխաների, ովքեր 50-րդ, 47-րդ, 16-րդ և այլ հերթագրման համարն են ունեցել՝ չպահպանելով երեխաների ընդունելության համար սահմանված կարգը և հերթագրման հաջորդականությունը։
Ռազմիկ Մկրտչյանը հայտնել էր, որ խնդիրը լուծված է. վաղաժամկետ լուծվել է տնօրենի հետ ժամկետային աշխատանքային պայմանագիրը:
«Առողջապահության նախարարի հրամանով եմ առաջնորդվել». թիվ 133 մանկապարտեզի տնօրեն