Վստահեցնում եմ՝ ընտրությունների ընթացքում մարզերում, նաև Սյունիքում, ՔՊ-ն ավելի շատ ձայն է հավաքելու, քան Երևանում. Ալեն Սիմոնյան (տեսանյութ)

Երբ ընտրությունների տվյալները կլինեն, կտեսնեք, թե ինչ պատկեր կլինի Երևանի կենտրոնում, և ինչ պատկեր կլինի մարզերում։ Ես վստահեցնում եմ, որ մարզերում, նաև Սյունիքում, «Քաղաքացիական պայմանագիր» կուսակցությունը շատ ավելի շատ ձայն է հավաքելու։ Այս մասին լրագրողների հետ զրույցում ասաց ԱԺ փոխնախագահ Ալեն Սիմոնյանը։

Դիտարկմանը, թե հասարակության մեջ տեսակետ կա, թե հեշտ է խոսել մարզերի մասին՝ գտնվելով Երևանում, և թող իշխող ուժի ներկայացուցիչներն ապրեն սահմանամերձ մարզերում, հետո միայն տեսակետ հայտնեն, Սիմոնյանն արձագանքեց․

«Երևանում, երբ դուրս ես գալիս կենտրոն, որտեղ ապրում են նախկին իշխանության ներկայացուցիչները, որտեղ մարդիկ տեղափոխվել են և հարստանալով բնակարաններ են գնել, տպավորություն է, որ երկիրը քանդվում է, վարչապետին, իշխող ուժին բոլորն ատում են, բայց երբ գնում են մարզեր, պատկերն այլ է։ Մենք Սյունիքի մարզից ու ՀՀ տարածքից որևէ սանտիմետր որևէ մեկին չենք զիջել»,- ասաց նա։

Դիտարկմանը, թե Նիկոլ Փաշինյանին թույլ չտվեցին գնալ Սյունիք, պատգամավորն արձագանքեց․ «Վարչապետին ոչ թե թույլ չտվեցին, այլ մի փոքրիկ խմբակ մի փոքր ճանապարհ փակեց, և վարչապետը չգնաց սրացումների»։