Իշխանությունը և ընդդիմությունը սևեռվել են վարչապետի աթոռի վրա և քաղաքական ճգնաժամը հաղթահարելու համար ոչինչ չեն անում. Գարիկ Քեռյան
Գործող իշխանությունը և ընդդիմությունն ունեն 2 մոտեցում, այդ երկու մոտեցումների պարագայում էլ քաղաքական ճգնաժամը լուծում չի ստանում: Այս մասին Tert.am-ի հետ զրույցում ասաց քաղաքագետ Գարիկ Քեռյանը:
«Պետք է արձանագրենք 2 մոտեցում․ իշխանությունն ասում է՝ եկեք ստորագրենք հուշագիր, ինչ-որ պայմանների մասին և անենք արտահերթ ընտրություններ՝ մեր ղեկավարմամբ՝ չնայած արտահերթ ընտրությունների առաջարկը եղել է ընդդիմության կողմից»,- ասաց Գագիկ Քեռյանը:
Նա նաև մեկնաբանեց ընդդիմության մոտեցումը, որը իրենից ենթադրում է Փաշինյանի հրաժարականը և արտահերթ ընտրությունները:
«2-րդ դիրքորոշումը ընդդիմության և արտախորհրդարանական ընդդիմության մոտեցումն է՝ Նիկոլ Փաշինյանը կեղծելու է ընտրությունները, իսկ մենք պետք է կազմենք ժամանակավոր իշխանություն Փաշինյանի հրաժարականից հետո և 1 տարի անց անցկացնենք ընտրություններ»,- ասաց նա:
Քաղաքագետը նաև ընդգծեց՝ երկու մոտեցումներն էլ սահմանադրական թերություններ ունեն, և երկու մոտեցումներն էլ չեն լուծում քաղաքական ճգնաժամը, այլ պայքար են մղում գործադիր իշխանության համար: Առաջին դեպքում քաղաքական ճգնաժամը գուցե խորանա, որովհետև հնարավոր են ընտրության կեղծումներ, իսկ 2-րդ պարագայում իրատեսական չէ, որ «Իմ քայլը» խմբակցությունը կընտրի Վազգեն Մանուկյանին:
«Երկու մոտեցումներն էլ սահմանադրականության իմաստով լուրջ թերություններ ունեն: 1-ին դեպքում հնարավոր է, որ արտահերթ ընտրություններից հետո քաղաքական ճգնաժամը չհաղթահարվի, որովհետև ընդդիմության որոշ հատվածներ կարող են համարել այն կեղծված, իսկ 2-րդ դեպքում, թերևս կարելի է ենթադրել, որ «Իմ քայլը» պետք է ընտրի վարչապետ Վազգեն Մանուկյանին, ինչը իրատեսական չէ: Հստակ կարող ենք նշել՝ երկու կողմերն էլ չեն լուծում քաղաքական ճգնաժամը, այլ պայքարում են գործադիր իշխանության համար»,- մեկնաբանեց քաղաքագետը:
Գարիկ Քեռյանն առաջարկեց 3-րդ մոտեցում՝ նշելով, որ անցել է շուրջ 4 ամիս, բայց ոչ մի էական փոփոխություն չկա, և պետք է լինի 3-րդ մոտեցում:
«Արդեն անցել է շուրջ 4 ամիս, և չկա մեկ այլ լուծում, և երկու կողմերն էլ չեն զիջում, բնականաբար, պետք է այստեղ ենթադրել, որ պետական շահերից ելնելով՝ պետք է գտնել 3-րդ լուծում»,- ասաց Քեռյանը:
Նրա հավաստմամբ՝ պետք է լինի քննարկում կլոր սեղանի շուրջ, որտեղ կլինի Կենտրոնական ընտրական հանձնաժողովը, ՀՀ նախագահը, չեզոք քաղաքագետները ու իրավաբանները:
«Կա սահմանադրական մարմին՝ Կենտրոնական ընտրական հանձնաժողովը, և կա հանրապետության նախագահը, որը որևիցե քաղաքական կուսակցության չի պատկանում, ըստ Սահմանադրության: Կարծում եմ՝ հնարավոր է կնքել համատեղ հուշագիր՝ ընդդիմության և իշխանության միջև, և կլոր սեղանի շուրջ քննարկել որոշակի հարցեր, որտեղ կարող են լինել քաղաքագետներ, իրավաբաններ, որոնք չեզոք են»,- նշեց քաղաքագետը:
Գարիկ Քեռյանը նաև նշեց՝ պետք է հաստատվի ընտրական այս օրենքը, և մոտակա երկու ամիսների ընթացքում լինեն արտահերթ ընտրություններ:
«Պետք է 1-2 շաբաթվա ընթացքում հաստատել այս ընտրական օրենքը, հաստատել տվյալ որոշումը և կատարել ընտրություններ 2 ամսում, այլապես մենք կունենանք նման ճահճացված կարգավիճակ, որը կտանի պետական կառավարման քայքայման և, հնարավոր է, քաղաքացիական բախումների»,-ասաց Գարիկ Քեռյանը: