Պարոն Օհանյանի մոտ առողջական խնդիրներ կան, ես լիահույս եմ, որ հաջորդ դատական նիստին նա կկարողանա ներկա լինել. Արամ Վարդևանյան
Պարոն Օհանյանի մոտ կան առողջական խնդիրներ, ես լիահույս եմ, որ հաջորդ դատական նիստին պարոն Օհանյանը կկարողանա ներկա գտնվել: Այս մասին լրագրողների հետ զրույցում ասել է Ռոբերտ Քոչարյանի փաստաբանական թիմի անդամներից Արամ Վարդևանյանը:
«Դատական նիստի վերաբերյալ կարող եմ ասել, որ Պարոն Օհանյանի մոտ որոշակի առողջական խնդիրներ են առկա, և պարոն Մեջլումյանը տեղեկացրեց՝ նույնիսկ այս պահին գտնվում է զինվորական հոսպիտալում: Ես հուսով եմ՝ հաջորդ դատական նիստին Սեյրան Օհանյանը կլինի ապաքինված, և կունենանք դատական նիստ»,- ասաց Վարդևանյանը:
Փաստաբանը նաև ընդգծեց՝ նախորդ անգամ Գևորգյանի բացակայության ժամանակ դատարանը կասկածանքով է վերաբերվել:
«Հիմա կարող եմ արձանագրել, որ այս անգամ առնվազն դատախազների կողմից հայտարարություն չարվեց, որովհետև նախորդ դատական նիստին, երբ պարոն Գևորգյանի մոտ առկա էին առողջական խնդիրներ, դրա վերաբերյալ կասկածանքով էին վերաբերվում, դատարանն այսօր ստացավ առողջական վիճակի վերաբերյալ համապատասխան փաստաթուղթը, և այդքանով այդ հարցը սպառվեց»,- ասաց փաստաբանը:
Նա նաև անդրադարձավ Վազգեն Մանուկյանի գործին՝ նշելով, գործն այնքան էական չէ, որ նույնիսկ անդրադարձ չի կատարվել, սա հերթական քաղաքական պատվեր է:
«Վազգեն Մանուկյանի գործով՝ այնքան ոչ էական հանգամանք է, որը լրացվել է, և ես նույնիսկ դրա անդրադարձ չէի կատարել, իսկ խոսքը նրա մասին է, որ պարոն Մանուկյանը հայտարարել էր, որ Զինված ուժերը, Գլխավոր շտաբն անօրինական հրաման չպետք է կատարեն, ըստ Քննչական կոմիտեի՝ անօրինական հրաման չկատարելու կոչը ևս իշխանություն զավթելու, բռնությամբ սահմանադրական կարգը տապալելուն ուղղված կոչ է, այլ կերպ ասած՝ անմտություն և հերթական քաղաքական պատվեր»,- ասաց Արամ Վարդևանյանը:
Փաստաբանը նաև մեկնաբանեց «Հայ ազգային կոնգրեսի» փոխնախագահ Արամ Մանուկյանի հայտարարությունը, որտեղ ասվում էր՝ «Մարտի 1»-ի դատական գործընթացը թատերական ներկայացում է:
«Այս քրեական գործը որևէ առնչություն չունի «Մարտի 1»-ի զոհերի հետ, լրիվ այլ բովանդակության մեղադրանք է, իսկ այն ձևակերպումները, որոնք օգտագործել է, ես հույս կհայտնեմ, որ ԲԴԽ-ն կարձագանքի դրան, և դա առնվազն անհարգալից վերաբերմունք է դատարանի և դատավարության նկատմամբ, որն անընդունելի է»,- մեկնաբանեց նա:
Հիշեցնենք՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, շարունակվում է սահմանադրական կարգի ենթադրյալ տապալման գործով հերթական նիստը։ Գործով անցնում են ՀՀ երկրորդ նախագահ Ռոբերտ Քոչարյանը, Սեյրան Օհանյանը, Արմեն Գևորգյանը և Յուրի Խաչատուրովը։