Դիմակ կրելու խստացման մասին հայտարարության մեջ տեսնում եմ քաղաքական ենթատեքստ, օրինակ՝ արտակարգ դրության խստացման, հանրահավաքների արգելման և այլն. բժիշկ համաճարակաբան Ռուբեն Հովհաննիսյան

Կորոնավիրուսով վարակման դեպքերի ավելացումը, եթե այդպիսին իրականում կա, կարող է պայմանավորված լինել եղանակի սեզոնային փոփոխության ժամանակ մարդու օրգանիզմում իմունային համակարգի որոշակի թուլացմամբ, ինչի արդյունքնում կորոնավիրուսով, որպես ներկայումս օդակաթիլային առավել դոմինանտ ինֆեկցիա, վարակվելու դեպքում որոշակիորեն կավելանա առողջապահական հաստատություններ դիմելիությունը: Այս մասին Tert.am-ի հետ զրույցում ասաց բժիշկ-համաճարակաբան Ռուբեն Հովհաննիսյանը:

Նրա համոզմամբ՝ հանրահավաքների ժամանակ, բաց տարածքներում վարակի տարածումը քիչ հավանական է: Հիմնական հավանականությունը փակ տարածքներում մարդկանց կուտակումների ժամանակ է, այն էլ, երբ միջանձնային հեռավորությունը չի պահպանվում և տևական շփման գործոնն է առկա:

«Դիմակների կրելու խստացումների հետ կապված պետք է հասկանալ հասարակության վերաբերմունքը դիմակների կրմանը, տեսնում ենք, քաղաքացիները դիմակներն ինչպես են դնում, եթե դնում էլ են, ձեռքերով անընդհատ կպնելով, հետո դնում գրպանը, հետո նորից կրում, մինչդեռ այդ դիմակները մեկանգամյա օգտագործման համար են, նաև դիմակը պետք է սերտ կպած լինի դեմքին: Այս ամենը հարցեր են, որոնք չուսումնասիրվեցին՝ տեսնում ենք միայն պոպուլիստական հայտարարություններ, բարձրագոչ խոսքեր»:

Հովհաննիսյանը նաև նշեց, որ պետք է նկատի ունենալ, որ քաղաքացիներն անընդհատ դիմակ կրել և այդ անբնական վիճակում ամիսներով ապրել չեն կարող, ընդգծելով, որ իր համոզմամբ՝ առողջապահության նույն այդ պատասխանատուներից շատերը, որոնք խստացումների քարոզ են անում, միայն տեսախցիկների առջև են դիմակ կրում: Իսկ նրանք ովքեր արդեն հիվանդացել և լավացել են, գիտեն, որ իրենց կողմից դիմակ դնելը իմաստ չունի: Այդ պատճառով, բարձր ամբիոններից հայտարարություններ անել, որ դիմակ կրելը պետք է խստացնել, լուրջ չեմ ընդունում: Այստեղ ավելի շատ կարող եմ տեսնել քաղաքական ենթատեքստ, օրինակ՝ արտակարգ դրության խստացման, հանրահավաքների արգելման և այլն»:

Անդրադառնալով առողջապահության նախարար Անահիտ Ավանեսյանի այն հայտարարությանը, որ հասարակության մի մասը մտածելով, որ արդեն վարակվել է, հիմա դիմակ չի կրում, Հովհաննիսյանը նշեց, որ ապացույց չկա, որ վարակավելուց հետո անձը կարող է այդ շտամով վարակվել, գուցե լինեն եզակի դեպքեր, որի ժամանակ հազարավոր առողջացածներից մեկ-երկուսը կրկին կվարակվեն նույն շտամով, իհարկե, չի բացառվում, սակայն նույնիսկ այդ դեպքում էլ առավել հավանական է, որ հիվանդությունը շատ ավելի թեթև ընթացք կունենա: Բայց որ այն կարող է համաճարակաբանական նշանակություն ունենալ, այդպիսի հիմքեր չկան:

Անդրադառնալով պատվաստումներին`Հովհաննիսյանը նշեց, որ պետք է հասկանալ, թե որ խմբերին են պատվաստում, օրինակ, եթե տվյալ անձն արդեն վարակվել և առողջացել է և ունի հակամարմիններ, որքանո՞վ է արդարացված, որ նա ևս պատվաստանյութ ստանա: