Յուրաքանչյուր իշխանություն պետք է գիտակցի, որ իրենով չի սկսվում և ավարտվում հայ-վրացական հարաբերությունները. Տաճատ Վարդապետյան

Վրաստանում հոկտեմբերի 27-ին սպասվելիք նախագահական ընտությունների վերաբերյալ վիրահայության կողմնորոշման , նախագահի թեկնածուների խոստումների ու իրականության մասին Operativ.am-ի թղթակիցը զրուցեց ՀՀԿ խմբակցության պատգամավոր, ծնունդով Ջավախքից Տաճատ Վարդեպետյանի հետ:

-Ի՞նչ է սպասվում տարածաշրջանում Վրաստանի նախագահական ընտրություններից հետո: Ի՞նչ կփոխվի:

-Նախագահական ընտրություններն, անշուշտ, տարածաշրջանում ինչ-որ բան կփոխեն: Ես, առաջին հերթին, ուզում եմ, որ մեր տարածաշրջանում թափանցիկ, անցնցում ընտրություններ լինեն և վերջապես մեր տարածաշրջանն արդեն որդեգրի իր կարգուկանոնը:

-Գլխավոր թեկնածուները, ո՞ւմ միջև կընթանա պայքարը և ովքե՞ր ավելի մեծ շանսեր ունեն Ջավախքում:

-Այսօր գրանցված թեկնածուների քանակական կազմը ինձ հուշում է, որ չի բացառվում, որ երկրորդ փուլ տեղի ունենա: Չնայած ես հակված եմ, որ հիմնական պայքարը կընթանա թեկնածուներից Դավիթ Բաքրաձեի, Գեորգի Մագվելաշվիլու և Նինո Բուրջանաձեի միջև:

-Սաակաշվիլու թիմակից նախագահի թեկնածու Դավիթ Բաքրաձեի՝ վերջերս կատարած այցը Ախալքալաք, ունե՞ր որևԷ նշանակություն, ինչո՞ւ հենց Ախալքալաք, այն էլ ոչ քարոզարշավի շրջանակներում:

-Ես դրան դրական եմ վերաբերվում, դա շատ կարևոր է ընտրողի համար և բացի ֆավորիտ համարվող թեկնածուներից, կուզենամ, որ մյուս թեկնածուները ևս այցելեն Ջավախք, անպայման հաշվի առնեն վիրահայերի ձայների կարևորությունը և նրանց կարծիքները: Կարծում եմ՝ դրա համար:

-Արդյո՞ք վիրահայերի մեծամասնությունը նույն կողմնորոշումը կունենա նախագահական ընտրություններում:

- Կարող է և հայությունը նախագահական ընտրությունների վերաբերյալ տարբեր կողմնորոշումներ ունենալ, չնայած ես ակնկալում եմ, հորդորում եմ, որ ընտրություններից առաջ համախմբում լինի ամենանախընտրելի թեկնածուի շուրջ, բայց սա որպես քարոզչություն թող չընկալվի: Բոլոր դեպքերում մեր հայրենակիցները պետք է ծանրութեթև անեն և ամենանախընտրելի թեկնածուի կողքին լինեն, բայց դա չպետք է լինի կուրորեն, այլ ջավախահայերը պետք է ունենան հիմնավորումներ, թե ինչու են սատարում տվյալ թեկնածուին:

-Նախորդ երկու նախագահական ընտրություններին՝ Վարդերի հեղափոխությունից հետո, բոլոր հայաշատ վայրերում մեծամասնությունը քվեարկել է հօգուտ Միացյալ ազգային շարժմանը՝ նախագահի թիմին: Նաև վերջին խորհրդարանական ընտրությանը: Այս դեպքում կտրուկ փոփոխություններ կարո՞ղ են լինել:

-Ես կարծում եմ, որ ամեն դեպքում գոնե որոշակի փոփոխություններ կլինեն, դա կախված է նաև թեկնածուների վերաբերմունքից, նաև նրանից, թե թեկնածուների նախընտրական դրույթները որքան իրատեսական են:

-Ի՞նչ կարող ենք սպասել Իվանիշվիլու թիմակցի կամ Սաակաշվիլու թիմակցի հաղթելու դեպքում:

-Ես նաև այն կարծիքն եմ ուզում արտահայտել, որ գուցե «Վրացական երազանքի» թեկնածուի ընտրվելու պարագայում, քանի որ երկիշխանության մթնոլորտ է Վրաստանում, Բիձինա Իվանիշվիլու՝ խորհրդարանական ընտրություններից առաջ արված խոստումները կյանքի կոչվեն, այսինքն՝ նաև քաղաքական պայմանները նպաստեն նրան: Իսկ, ինչ խոսք,  Սաակաշվիլու թիմի թեկնածուի ընտրվելու դեպքում ես կուզենամ, որ նախկինում եղած թերությունները վերանան:

-Նախագահական ընտրությունների արդյունքը կարո՞ղ է փոխել հայ-վրացական հարաբերությունների ընթացքը:

-Հայաստանն ու Վրաստանը եղբայրական պետություններ են, պետք է այդ եղբայրությունը նաև արտաքաղաքական բովանդակություն ունենա, միայն քաղաքականությամբ չորոշվի հայի և վրացու բարեկամությունը, որովհետև մենք հազար թելերով կապված են, և այդ թելերի մեջ աորտան Ջավախքն է: Իհարկե մեր հարաբերություններում եղել են, կան ու կլինեն քաղաքական կնճիռներ, մենք պետք է քաղաքական հեռատեսությամբ հարթենք այդ ամենը:

Յուրաքանչյուր իշխանություն պետք է քաջ գիտակցի, որ իրենով չի սկսվում և ավարտվում հայ-վրացական հարաբերությունները: 

-Իվանիշվիլին անընդհատ հայտարարում է քաղաքականությունից դուրս գալու մասին, բայց նրա թիմից ներկայացված է նախագահի թեկնածու: Ի՞նչ դիրքորոշում ունի այս առումով վիրահայությունը:

-Վրաստանի քաղաքացիներն ընտրեցին «Վրացական երազանքը», սակայն Իվանիշվիլու այն հայտարարությունը, որ ինքը կլքի քաղաքականությունը ընտրություններից հետո,  ընտրազանգվածը կարող է անորոշության մեջ ընկնել:

Ես չեմ կարող կանխատեսել ընտրությունների ելքը, երկրորդ փուլ տարբերակն էլ չեմ բացառում, իսկ մաղթանքս մեկն է, որ ընտրություններն անցնեն խաղաղ, թափանցիկ ու արդարության առավելագույն աստիճանում:

Զրուցեց Բեթղեհեմ Արաբյանը