Դատարանն արձանագրել է՝ Արա Սաղաթելյանին առաջադրված մեղադրանքի որևէ հոդվածով հիմնավոր կասկած առկա չէ, նա լրիվ անօրինական հիմքերով գտնվել է անազատության մեջ. փաստաբան
ՀՀ-ում կատարվել է տոտալ անօրինականություն, մարդկանց քմահաճույքների պատճառով ՀՀ նախագահի աշխատակազմի «Հանրային կապերի և տեղեկատվության կենտրոնի» նախկին տնօրեն, ԱԺ աշխատակազմի նախկին ղեկավար Արա Սաղաթելյանը 14 օր գտնվել է անազատության մեջ: Այս մասին լրագրողների հետ զրույցում ասաց փաստաբան Միհրան Պողոսանը՝ անդրադառնալով Սաղաթելյանի ազատ արձակմանը:
Հիշեցնենք, որ Երևանի ընդհանուր իրավասության դատարանը 2 ամսով կալանավորել էր Սաղաթելյանին՝ ֆեյսբուքյան կեղծ օգտատիրոջ գործով բավարարելով ԱԱԾ-ի միջնորդությունը:
Նրա խոսքով՝ Սաղաթելյանի նկատմամբ կալանավորումը որպես խափանման միջոց կիրառվել էր միմիայն զանգերի, ճնշումների ու զարտուղի ճանապարհներով՝ նրան քրեակատարողական հիմնարկում տեսնելու ցանկությունից դրդված: Գործը, առաջադրված մեղադրանքը, ըստ փաստաբանի, գտնվում է աբսուրդի գագաթնակետում:
«Ես ազատ արձակումը որպես հաղթանակ չեմ դիտարկում, դիտարկում եմ որպես պայքարի սկիզբ, որովհետև հանցագործության հետ որևէ կապ չունեցող անձին իր բնական միջավայրից հանել են և լրիվ անօրինական կարգով պահել են քրեակատարողական հիմնարկում: Վերաքննիչ քրեական դատարանն արձանագրել է, որ Արա Սաղաթելյանին առաջադրված մեղադրանքի որևէ հոդվածով հիմնավոր կասկած առկա չէ, դա նշանակում է, որ Արա Սաղթելյանը լրիվ անօրինական հիմքերով գտնվել է անազատության մեջ»,-ներկայացրեց փաստաբանը:
Նա նշեց, որ այս գործով հաղթանակ կարող են գնահատել միայն մեկ պարագայում. «Դա կլինի, երբ տոտալ անօրինականությունների հետ առնչություն ունեցող բոլոր պաշտոնատար անձինք (կլինի դատարանի նախագահ, պատվեր կատարող դատավոր, դատարանի նախագահին պատվեր տվող այլ պաշտոնատար անձ) լրիվ օրինական հիմքերով կհայտնվեն քրեակատարողական հիմնարկում և կխորհեն այն մասին, թե ինչպես է ստացվում, որ անձին որևէ հանցագործության հետ առնչություն չունենալու պարագայում ուղղակի հրահանգով ստիպում են, որ հայտնվի քրեակատարողական հիմնարկում»,-ասաց նա՝ նշելով, թե այդպիսի դատավորներն են, որոնք գործող իշխանությանը թույլ են տալիս ԱԺ-ում «վայրահաչյուններ» իրականացնել ԲԴԽ նախագահի հասցեին:
«Ու հենց այդ պատճառով է, որ իշխանությունը, ցանկանալով զանգվող ու զանգող դատավորներ ունենալ, փորձում է ԲԴԽ նախագահին իր զբաղեցրած պաշտոնից հեռացնել»,-հավելեց Պողոսյանը: