«Քառորդ դարի ընթացքում ոչ մի բան չեմ գողացել պետությունից». Լուկաշենկոն` «պալատ» ունենալու խոսակցությունների մասին
Եթե ինչ-որ մեկը կարող է Բելառուսում գտնել նախագահի անձնական պալատը, ապա նա կարող է տեղափոխվել այնտեղ: Այս մասին մարտի 5-ին հայտարարել է նախագահ Ալեքսանդր Լուկաշենկոն՝ մոտոհեծանվային գործարան կատարած այցի ժամանակ, գրում է EADaily լրատվականը:
«Ես ոչ մի բան չեմ գողացել իմ պետությունից, ոչ մի բան չեմ վերցրել», - ընդգծել է Բելառուսի ղեկավարը՝ ավելացնելով, որ եթե ինչ-որ մեկը կարողանա գտնել պալատները, ապա նա այնտեղ կհրավիրի լրատվամիջոցներին և ցույց կտա ամեն ինչ:
Լուկաշենկոյի խոսքով ՝ իր հակառակորդները փորձում են ամեն ինչ անել երկիրը կոտրելու համար, իսկ նրանց հիմնական թիրախը նախագահն է:
«Նրանք ցանկանում են կոտրել, մենք էլ պետք է դիմակայենք, և մենք կանենք դա», - ասել է նա:
«Հիմա մեր փախածները, ինչպես նկատել եմ նյութերից, և մեր հետախուզության սպաները նույնպես դա տեսնում են, գտել են «Պուտինի պալատը», և այժմ նրանք փորձում են գտնել «Լուկաշենկոյի պալատը»: Նրանց համար այժմ սա ամենակարևորն է. ավելի շատ կեղտոտ հնարքներ նետել լրատվական տարածք, որպեսզի առնվազն մինչև ապրիլ կրակի մեջ փայտ գցեն: Հասկանում եք, նրանք պետք է կատաղեցնեն Բելառուսի ժողովրդին: Շարժեն, որպեսզի, ինչպես ասում են, մեջբերում եմ. «ակտիվության ալիքը չքնի»: Հետևաբար, նրանք ցանկացած «ֆեյքեր» են գցելու: Մենք, համենայն դեպս ես, պատրաստ ենք դրան», - նշել է նա մարտի 2-ին անվտանգության ուժերի հետ հերթական հանդիպմանը:
Նրա խոսքերով` «թող փնտրեն, թող ցույց տան, իսկ հետո մենք բողոքողների մի մասի ձեռքից կբռնենք ու ցույց կտանք»:
«Ես ուզում եմ ձեզ նորից ասել. քառորդ դարի ընթացքում Լուկաշենկոն ոչ մի բան չի գողացել պետությունից: Եվ ոչ մի պալատ ... Ալեքսանդրիայում ես ունեմ 7-8 մետրանոց «պալատ», որտեղ ապրում էինք ես և մայրս: Ահա այդ պալատը: Բարով գաք, բաց է տեսնելու համար, թե որտեղ է ապրել Բելառուսի առաջին նախագահը»,-ընդգծել է Լուկաշենկոն:
Նշենք՝ ավելի քան կես տարի Բելառուսում շարունակվում են բողոքի ակցիաները՝ նախագահ Ալեքսանդր Լուկաշենկոյի հրաժարականի պահանջով: Ընտրությունների արդյունքների հետ չհամաձայնվող ցուցարարների գործողությունները կոշտ ճնշվում են իրավապահ մարմինների կողմից: Տասնյակ հազարավոր մարդիկ բերման են ենթարկվել, շատերը խոսել են մեկուսարաններում իրականացվող խոշտանգումների և ծեծի մասին։
Արդեն իսկ չորս մարդ է զոհվել իրավապահների հետ բախումների հետևանքով։