«Իմ քայլից» ոչ ոք չի դատապարտել վարչապետի` «վնգստացող դատավորների» մասին հայտարարությունը, և ԲԴԽ նախագահը շրջել է դա իրենց դեմ․ Էդմոն Մարուքյան (տեսանյութ)

Իրենք բոլորը գիտեն, որ Ռուբեն Վարդազարյանը երբեք էլ իմ հերոսը չի եղել, բայց երբ իրենք ուզում էին, որ նա լինի ԲԴԽ նախագահ, երևի մտածում էին, որ այդ մարդը պետք է իրենց հրահանգները կատարի, և այստեղ անազնիվ մոտեցում կա։ Այս մասին այսօր Ազգային ժողովում ճեպազրույցների ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԲԴԽ նախագահի «Իմ քայլը» խմբակցության պատգամավորների հարցադրումներին։

Նա հարց բարձրացրեց, թե մենք ուզո՞ւմ ենք ունենալ անկախ դատական իշխանություն, թե՞ ուզում ենք ունենալ կամակատար դատական իշխանություն, որից գոհ կլինի հենց իշխանությունը։ Ըստ նրա՝ ինդիկատորն այն է, որ եթե իշխանությունը քննադատում է դատական իշխանությանը, ուրեմն դատական իշխանությունը լավ է աշխատել։

«Երբ իշխանություններն ասում են՝ կապ են տեսնում Ռուբեր Վարդազարյանի և Արթուր Վանեցյանի միջև՝ եփած հավը կծիծաղի, այդ մարդիկ 600 անգամ հրապարակային հայտարարել են, որ ընկերներ են և այդ մասին գիտեին, երբ Ռուբեն Վարդազարյանն ընտրվել է ԲԴԽ նախագահ։ Այս երկիրը դարձել է օդում խոսակցությունների երկիր, ով ում ինչի մեջ ասես օդում կարողանում է մեղադրել։ Հո ասելով չի, ինչ ասես ունեք, նկարում եք, կա փաստ՝ գնացեք բռնեք»,–ասաց նա։

Էդմոն Մարուքյանը նաև նշեց, որ պատգամավորներից ոչ ոք չի դատապարտել Նիկոլ Փաշինյանի՝ «վնգստացող դատավորների» մասին հայտարարությունը, և ԲԴԽ–ն շրջել է դա իրենց դեմ, հղում է կատարել դրան։ Պատգամավորը նկատեց, որ ինչ ցանում ես, այն էլ հնձում ես։

«Քաղաքական ճգնաժամը երկրում ավելի է խորացել, այդ ճգնաժամին գումարվել է զինված ուժերում ստեղծված ճգնաժամը, և այս իմաստով ես առաջարկում էի, որ մենք բանակին հանգիստ թողնենք, գնանք ընտրությունների»,–ասաց Էդմոն Մարուքյանը։

Պատգամավոր նաև նշեց, որ «Լուսավոր Հայաստանը» շարունակելու է փնտրել լուծումներ՝ երկիրը այս վիճակից դուրս հանելու համար, ապա կոչ արեց քաղաքական ուժերին միանալ առաջարկությանը և գնալ արտահերթ խորհրդարանական ընտրությունների, քանի որ, ըստ նրա, այս վիճակից դուրս գալու միակ ճանապարհը դա է։

«ԲՀԿ–ի մեր գործընկերներ հետ դիրքորոշումը, երբ իմանանք, կոնսուլտացիաները կսկսենք, առանց մեզ չի կարող լուծարվել խորհրդարանը, առանց ԲՀԿ–ի էլ՝ չի կարող»,–ասաց նա։