Մեր ազգային և պետական շահերի ձևավորման առանցքը խեղվել է, հետապնդվում են հակաադրբեջանական քարոզչության ճարտարապետներ Ա.Սաղաթելյանը, Կ.Բեքարյանը, Ա.Էլիբեգովան. Վահրամ Տեր-Մաթևոսյան (տեսանյութ)

Թուրքիայում լավ գիտակցում են, որ Հայաստանի ներքաղաքական խնդիրների մասին իրենց հայտարարությունները ցավագին են ընդունվում մեր հանրության՝ իմունիտետ ունեցող հատվածի կողմից. այս անարգել տեղեկատվական հաղթարշավը, որը Թուրքիան կազմակերպել է Հայաստանի և հայ ժողովրդի նկատմամբ, ուղեկցվում է մեր հասցեին անթաքույց ծաղրուծանակով և անարգանքով: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել Հայաստանի ամերիկյան համալսարանի քաղաքագիտության և միջազգային հարաբերությունների ամբիոնի վարիչ, պատմագիտության դոկտոր Վահրամ Տեր-Մաթևոսյանը:

«Ո՞ւր է ՀՀ խորհրդարանական դիվանագիտությունը, ինչո՞վ էր զբաղված պատերազմի ընթացքում, բացի հուսալուց, որ ԵԽԽՎ-ում պետք է ինչ-որ բան անել։ Խորհրդարանն ունի բարեկամության խմբեր տարբեր երկրների հետ, ի՞նչ էին անում նրանք պատերազմի օրերին։ Մեր պետական մեքենան պետք է այս թմբիրից դուրս գա, պատասխանատուները պետք է ուշքի գան, աշխատեն։ Այս հարահոսի մեջ շատ մեծ է հանցավոր անգործության գինը»,- ասել է պատմաբանը:

Ըստ Տեր-Մաթևոսյանի՝ վերջին երեք տարում ամեն ինչ արվեց, որ խաչ քաշվի անցյալում ձևավորված ավանդույթների վրա, և շատ մտահոգիչ է այն հետագիծը, որը թողնելու է այս իշխանությունը. «Անցած տարեվերջին Բաքվում Ալիևն ու Էրդողանը, ի թիվս այլ պայմանագրերի, կնքեցին նաև տեղեկատվական գործակցության հուշագիր։ Թուրքական և ադրբեջանական պետական մեքենաները սիներգիայի մեջ են, Բաքվից եկող ձևակերպումներն առանց խմբագրման հայտնվում են թուրքական լրատվական դաշտում։ Այս ամենի դիմաց ՀՀ-ն մենակ է մնացել, ավելին՝ ադրբեջանական քարոզչությանը դիմակայելու պետական ճարտարապետությունը փլուզված է, դրա հեղինակները՝ Արա Սաղաթելյանը, Կարեն Բեքարյանը, Անժելա Էլիբեգովան, հետապնդվում են»:

Փորձագետի կարծիքով՝ ՀՀ-ի նկատմամբ և՛ ներսից, և՛ դրսից ինֆորմացիոն օպերացիաներ են իրագործվում, որոնք բթացրել են հանրային զգոնությունը. «Այս իշխանության քայլերը ենթակա են դատապարտման։ Մենք մոռանում ենք ընդհանուր համապատկերը, դրանում այս իշխանությունն իր արածով ու չարածով ամենևին տեղ չունի։ Ֆունդամենտալ հարցերը, թե ուր ենք գնում, մղվել են երկրորդ պլան։ Ճգնաժամային վիճակում ենք, Արցախի պատկանելության հետ կապված թշնամական թեզերի տարածումը պետք է դիտել այդ օպերացիաների համատեքստում»:

Վահրամ Տեր-Մաթևոսյանի պնդմամբ՝ մեր ազգային-պետական շահերի ձևավորման առանցքը խեղվել է, հայտնվել տարաբնույթ հոսանքների ազդեցության ներքո, մինչդեռ մենք չենք կարող նման շռայլություն թույլ տալ մեզ։ «Թուրքիան և Ադրբեջանն ուշի-ուշով հետևում են Հայաստանի ներքաղաքական գործընթացներին՝ հասկանալով, որ սա դեռ վերջը չէ։ Տեղեկատվական անվտանգության առումով մեր տիրույթն անպաշտպան է, ցանկացած երկրի հատուկ ծառայություն այստեղ կարող է օպերացիաներ իրականացնել։ Շատ ցավալի փուլով ենք անցնում, 1920 թ-ից հետո սա ամենալուրջ քաղաքական ու պատմական ճգնաժամն է։ Ինքնիշխանության կորուստն ամենացավալի զգացումն է, այն դեռ երկար կթողնի իր հետագիծը»,- ամփոփել է Վահրամ Տեր-Մաթևոսյանը: