Նիկոլ Փաշինյանը չի կարող երկրորդ ԳՇ պետ նշանակել. Վարդան Պողոսյան

Այսօր արցախցին այլևս նախկինի նման չի լռում, միայն լսում է խոստումներ, որոնք մնում են օդում, իսկ գործողություններ ընդհանրապես չկան: Արցախում այլևս չկա բնականոն կյանքի անցնելու հույսը, բոլորը հիասթափված են ու ատելություն կա այս իշխանության հանդեպ: Այս մասին այսօր Tert.am-ի հետ զրույցում ասաց Արցախի ԱԺ «Արդարություն» կուսակցության պատգամավոր Մետաքսե Հակոբյանը՝ խոսելով Արցախում ծառացած խնդիրների մասին:

Նշենք, որ այսօր արցախցիները բողոքի ակցիա են իրականացել՝ պահանջելով կա՛մ իրենց ապրելու համար պայմաններ ստեղծել կա՛մ հնարավորություն տալ գնալ ու Արդբեջանի վերահսկողության տակ գտնվող իրենց տներում ապրել:

Պատգամավորը նշեց, որ նման ակցիա էլի է տեղի ունեցել մոտ մեկ ամիս առաջ, և նրանք իրականացրել են ստորագրահավաք, որն ուղարկել են Արցախում ռուսական խաղաղապահ առաքելության հրամանատար, գեներալ-լեյտենանտ Ռուստամ Մուրադովին:

Նա ներկայացրեց, որ այդ ստորագրահավաքին մասնակցել են հադրութեցիները, շուշեցիները և մնացյալ Արցախի բնակիչներն՝ անկախ բնակության վայրից:

«Քիչ առաջ Հադրութի բնակչի հետ էի խոսում, որն ապրում է Երևանում, քանի որ այսօր Արցախում տարրական հնարավորություն չկա ապրելու: Իրականում շատերն են ուզում վերադառնալ, բայց այս անգործությունը, որը տիրում է երկրում և պոպուլիզմով զբաղվող իշխանությունը, որը մատը մատին չի տալիս, չի ապահովում արցախցիների վերադարձն ու հանգիստ կյանքը հայրենի երկիր: Իշխանության մոտ միայն բեմից ելույթ ունենալն է լավ ստացվում, բեմը նրանց դուր է եկել ու բեմից չեն իջնում»,-ասաց նա:

Պատգամավորի խոսքով՝ բոլոր այն կառույցները, որոնք պետք է զբաղվեն երկրում առաջացած խնդիրների լուծմամբ, ոչինչ չեն անում և որևէ կերպ չի հասկացվում, թե որն է անգործության պատճառը. իշխանության կողմից որևէ մեկնաբանում ու պարզաբանում չկա: «Այսօր ինձ զանգած հադրութեցուն զանգել են, ասել, որ որոշում է եկել, առանց նշելու, թե դա ինչ որոշում է, ըստ որի, այդ հադրութեցիները, որոնք այդպես էլ Արցախ չվերադառնան, իրենց աշխատավարձերի 50 տոկոսն են ստանալու»,-ասաց նա և հավելեց, որ այս որշումը նոր է, որի նախագծին ընդդիմությունը դեմ էր քվեարկել, սակայն այդ ամեն դեպքում ընդունվել էր:

«Արցախի իշխանությունները մարդկանց աշխատավարձերի հետ կապված փոփոխություններ իրականացրեցին, մեզ մեղադրեցին բոլոր մեղքերի մեջ, որ այդ բյուջեին դեմ ենք քվեարկում: Իրենց ուզածին հասան ու հիմա մարդկանց զրկում են նաև իրենց աշխատավարձի չափով գումար ստանալու հնարավորությունից: 50 տոկոսը կրճատվում է, մնում է հասկանալ, թե մնացած 50 տոկոսն ում գրպանն է գնալու: Ակնհայտ է, որ այս իշխանությունները ոչինչ չանելով՝ մղսում են բյուջեն, ես վստահ եմ՝ սա գալիս է նրանից, որ իրենք գիտեն՝ իրենց քիչ ժամանակ է մնացել, ու թալանը շարունակում են»:

Հակոբյանը նշեց, որ հիմա Արցախում ապրելու տեղ ու հնարավորություն չկա, մարդիկ կան, որոնք նկուղում ու անմարդկային պայմաններում են ապրում, չունեն որևէ հնարավորություն կոմունալները վճարելու, ապրելու: «Մի խոսքով՝ շատ անկայուն վիճակ է, այս էժան, կեղտոտ քաղաքականությունից հետո, երբ մարդկանց հնարավորություն չի տրվում նորմալ պայմաններում ապրելու, իրենք մարդկանց ասում են՝ եթե չգաք, ապա աշխատավարձ չեք ստանա կամ կստանաք 50 տոկոսով»:

Պատգամավորը նշեց, որ Արցախի հյուրանոցներում տեղ չկա այլևս, իսկ բնակարանների վարձն ամենաքիչը 150 հազար դրամ է, սրա ֆոնին բնակիչն իշխանությունից ստանում է միայն 60 հազար դրամ: