«Բաքուն իր մոտ է պահում Հայաստանի ավելի քան 100 քաղաքացու. հարցի լուծման ձգձգումը հետաձգում է Երևանի և Բաքվի միջև երկխոսության մեկնարկը». Զ. Սինանյանը` «ՌԻԱ Նովոստի»-ին

Ադրբեջանը պահում է Հայաստանի 100-ից ավելի քաղաքացու, և այս հարցի լուծման ձգձգումը հետաձգում է Երևանի և Բաքվի միջև երկխոսության մեկնարկը: Այս մասին «ՌԻԱ Նովոստիին» տված հարցազրույցում հայտարարել է Սփյուռքի հարցերով Հայաստանի գլխավոր հանձնակատար Զարեհ Սինանյանը:

Սինանյանը նշել է, որ փետրվարի 24-ից մարտի 2-ը Ռուսաստան կատարած այցի ընթացքում նա այդ հարցը քննարկել է Ռուսաստանի Դաշնության փոխարտգործնախարար Անդրեյ Ռուդենկոյի հետ շփումներում:

«Մեզ համար ամենակարևոր թեման հայ ռազմագերիների և պահվող անձանց վերադարձն է Ադրբեջանից: Եվ ես այդ հարցը քննարկել եմ նաև Ռուսաստանի արտգործնախարարությունում կայացած հանդիպմանը ... Գիտեմ, որ նրանք հարյուրից ավելին են, բայց ես հստակ թիվ չունեմ. այդ իսկ պատճառով մենք երկխոսություն ենք վարում, քանի որ ուզում ենք նաև պարզել, թե քանի մարդ է գտնվում ադրբեջանական գերության մեջ, նրանք (Բաքուն) դա ավելի լավ գիտեն: Ռազմական գործողությունների պատճառով պարզ է, որ մենք ունենք մարդկանց ցուցակ, որում ընդգրկված մարդկանց գիտենք, որ գտնվում են Ադրբեջանում, և կա նաև անհայտ կորածների ցուցակ: Եվ այս դեպքում թվերն անընդհատ փոխվում են», - ավելացրել է նա:

Նրա խոսքերով ՝ Երևանը հույս ունի, որ Մոսկվան կշարունակի նպաստել այս խնդրի կարգավորմանը:

«Հուսով ենք, որ կկարողանանք հաջողության հասնել Ռուսաստանի Դաշնության հետ աշխատանքում: Ռուսական կողմը հավաստիացրել է, որ կնպաստի այս հարցի կարգավորմանը, և մենք նրանց հավատում ենք: Այս հարցի ձգձգումը հետաձգում է երկխոսության մեկնարկը Հայաստանի ու Ադրբեջանի միջև»,-հայտարարել է Սինանյանը: