ԱԺ պատուհաններից հրազենի բացահայտ ցուցադրությունը, զինվորական համազգեստով դիպուկահարների ցուցադրական ներկայությունը խաղաղ հավաքին պետության կողմից գործադրված անվտանգության անհամարժեք միջոց է․ ՄԻՊ
ՀՀ մարդու իրավունքների պաշտպանի աշխատակազմը ստացել է ահազանգեր առ այն, որ ՀՀ Ազգային ժողովի պատուհաններից բացահայտ երևում են դիպուկահարներ Բաղրամյան պողոտայում տեղի ունեցող հավաքի ուղղությամբ: Արձանագրվել են նաև նման հրապարակային անհանգստություններ, տեղեկացնում է ՄԻՊ–ը:
Պաշտպանի աշխատակազմը դիտարկում է իրականացնում լրատվամիջոցներով և հավաքի վայրում, որտեղ առկա են նաև երեխաներ ու տարեցներ:
ՀՀ Ազգային ժողովի շենքի պատուհաններից հրազենի բացահայտ ցուցադրությունը, այդ թվում՝ զինվորական համազգեստով դիպուկահարների ցուցադրական ներկայությունը խաղաղ հավաքին պետության կողմից գործադրված անվտանգության անհամարժեք միջոց է այս պահին Բաղրամյան պողոտայում առկա իրավիճակում:
Պետությունը կարող է անվտանգության միջոցներ ձեռնարկել, բայց դրանք յուրաքանչյուր դեպքում պետք է հաշվի առնեն կոնկրետ իրավիճակը և չպետք է լինեն այնպիսին, որ ստանան խաղաղ հավաքին մասնակցությունը կանխող կամ անհանգստություն պատճառող բնույթ:
Նշենք, որ Փաշինյանն ԱԺ եկավ՝ անվտանգության տասնյակ աշխատակիցներով և մեքենաներով:
Հիշեցնենք նաև, որ Բաղրամյան պողոտայում հանրահավաք է հրավիրել «Հայրենիքի փրկության շարժումը», ինչին զուգահեռ ԱԺ-ում կառավարության հետ հարցուպատասխանի ժամ էր:
Տեղեկացրել էինք, որ Ոստիկանությունը հատուկ նախապատրաստվել է. Ազգային ժողովի շենքի ներսում դիպուկահարներ են տեղակայված: