ԳՇ հայտարարությունով արձանագրվեց, որ 2 տարի վարչապետը և Կառավարությունն անում են ամեն ինչ բանակը վարկաբեկելու համար․ Թաթուլ Պետրոսյան
ԳՇ հայտարարությունը պարունակում էր մի քանի մեսիջ, որը ցույց էր տալիս բարձրաստիճան զինվորականների ունեցած մտահոգությունները: Նախ՝ հայտարարության մեջ հստակ ձևակերպվեց, որ վարչապետը և Կառավարությունն ունակ չեն ադեկվատ որոշումներ կայացնել: Այնուհետև արձանագրվեց, որ 2 տարի է՝ վարչապետը և Կառավարությունն անում են ամեն ինչ բանակը վարկաբեկելու համար: Այս մասին հրավիրված մամուլի ասուլիսի ժամանակ ասաց Արդարադատության գեներալ-մայոր Թաթուլ Պետրոսյանը:
«Կարևոր էր հայտարարության այն հատվածը, որ վարչապետը տապալել է արտաքին քաղաքականությունը և իրականացրել ներքին ապաշնորհ քաղաքականություն: Պահանջելով վարչապետի հրաժարականը՝ զինվորականները պահանջում էին, որ բռնի ուժ չկիրառվի ժողովրդի նկատմամբ:
Գեներալ-մայորը նկատեց, որ աշխարհում չկա մի երկիր, որի ղեկավարի հրաժարականը պահանջեն բազմաթիվ կազմակերպություններ և պաշտոնատար անձինք, կաթողիկոսները, գիտական շրջանակները:
Անդրադառնալով «Իսկանդերի» մասին վարչապետի արած հայտարարությունը՝ Թաթուլ Պետրոսյանը շեշտեց. «Դա խայտառակություն էր մեր պետության համար, ՌԴ-ն անչափ կարևորում է «Իսկանդերի» գոյությունը, այն ՌԴ-ի հպարտությունն է: Սա լուրջ արձագանք ստացավ ռուսական բարձրաստիճան շրջանակներում, նրանք ծիծաղում են մեզ վրա: Կամ ի՞նչ ասել է, երկրի ղեկավարին սխալ են զեկուցել «Իսկանդերի» կիրառման մասին, սա խոսում է Փաշինյանի թուլության և իրավիճակին չտիրապետելու մասին»:
Թաթուլ Պետրոսյանը, անդրադառնալով ԳՇ պետին պաշտոնից ազատելու իրավական մեխանիզմների մասին, ասաց. «Սահմանադրության 155–րդ հոդվածով առանձին կարգավիճակ է նախատեսված ԳՇ պետի համար: 155-րդ հոդվածի 3-րդ մասով նշվում է, որ ԶՈՒ ամենաբարձր զինվորական պաշտոնը Գլխավոր շտաբի պետի պաշտոնն է, որին նշանակում է հանրապետության նախագահը վարչապետի առաջարկով: Այսինքն՝ այս հոդվածով ԳՇ պետին տրված է առանին կարգավիճակ, հետևաբար ԳՇ պետի նշանակման մեխանիզմը չենք կարող դիտարկել 133-րդ հոդվածի շրջանակներում: Ընդ որում, 155-րդ հոդվածում նշված է միայն նշանակման և որ ազատման հիմքերը: Արդյո՞ք նախագահը այդ տեսանկյունից է վերադարձրել, դժվար է ասել։ Ցավոք, նախագահը, ով խոստացել էր լինել օբյեկտիվ, ենթարկվեց ճնշումների»:
Գեներալ–մայորը, խոսելով Օնիկ Գասպարյանին կալանավորելու վերաբերյալ մամուլում տարածված լուրերի մասին, նշեց. «Ռազմական դրության, պատերազմի ժամանակ ամբողջ զորքը անցնում են ռազմական ուժերի տրամադրության տակ: Հետևաբար՝ ուժային բոլոր կառույցների՝ Ոստիկանության, Ազգային անվտանգության,Ներքին զորքերը գտնվում են Օնիկ Գասպարյանի ենթակայության տակ, հետևաբար իրավաչափ չէ և որևէ մեկը իրավունք չունի այդ զորքերի միջոցով փորձի կալանավորել Օնիկ Գասպարյանին: Լուրեր կային, որ վարչապետը ԱԱԾ «Ալֆա» ջոկատին ևս հանձնարարել էր ձերբակալել Օնիկ Գասպարյանին, բայց յուրաքանչյուր սպա հասկանում է, թե ինչ է նշանակում Գլխավոր շտաբի պետ և ով է Օնիկ Գասպարյանը»:
Թաթուլ Պետրոսյանը Նիկոլ Փաշինյանի՝ «Մարտի 1-ի» հանրահավաքը համեմատեց սեպտեմբերի 19-ին Եռաբլուր կատարած այցի հետ: Երկու դեպքում էլ դա վերածվեց կարծես խինդ ու ծիծաղի և Նիկոլ Փաշինյանի վարչապետ նշանակելու միջոցառման: Ամփոփելով խոսքը՝ նա կաչ արեց սովորել բանակի արժանապատիվ գեներալների վարքագծից և արժանապատիվ կերպով բարձր պահել սպայի արժանապատվությունը։