Նախագահը պետք է հետևողական լինի, այլապես թե՛ բանակը, թե՛ ժողովուրդը կսահմանափակեն բոլորի գործունեությունը. Արծվիկ Մինասյան
Այսօր նախագահի հետ հանդիպման ժամանակ ներկայացրել ենք բոլորիս պահանջը, այն է՝ ստեղծված իրավիճակը պայթյունավտանգ է, եթե նախագահը կատարի հետքայլ և չդիմի ՍԴ. ինչո՞ւ է կարևոր այս հարցը, որովհետև ինչպես օրեր առաջ, այնպես էլ այսօր վերահաստատվում է այն վճռական մոտեցումը, որ Հայոց բանակն ու ժողովուրդը միասնական են: Այս մասին այսօր Նիկոլ Փաշինյանի հրաժարականի պահանջով Երևանի Բաղրամյան պողոտայում հրավիրված հանրահավաքի ժամանակ հայտարարեց ՀՅԴ ԳՄ անդամ Արծվիկ Մինասյանը:
Ըստ նրա՝ այս միասնականությունը չի կարող և չպետք է զիջի մի անձի, որը փորձում է շարունակաբար իր հակասահմանադրական, հակապետական, հակաազգային քայլերով թուլացնել և վերջնական կորստի տանել մեր պետականությունը:
«Դա նշանակում է, որ նախագահը պետք է հետևողական լինի, հակառակ դեպքում թե՛ բանակը, թե՛ ժողովուրդը կսահմանափակեն բոլորի գործունեությունը, որովհետև հակազգային քայլեր կնկատի»,-ասաց նա:
Արծվիկ Մինասյանը նաև նշեց, որ նախագահը չի կարող անգործություն դրսևորել առանց հիմնավորման: «Որպեսզի բոլոր տեսակետները մեկ միասնականության մեջ ունենան հստակ սահմանադրական մենկաբանություն և բովանդակություն, շատ կարևոր է, որ նախագահն այն ուղարկի ՍԴ՝ քննարկման համար, որպեսզի նաև հետագայում խուսափեն տարբեր մեկնաբանումներից: Այո՛, մենք ուզում ենք դավաճանին օր առաջ հեռացնել իշխանությունից, բայց մենք նաև խնայում ենք մեր պետականությունը, սիրում ենք մեր պետականությունը, խոնարհվում ենք մեր պետականության առաջ, դրա համար է, որ մեր ժողովուրդը համբերատար, հետևողականորեն փորձում իրականության ճանապարհը բռնած հասնել երկրում դավաճան իշխանության հեռացմանը»,– ասաց նա: