Իմ նկատմամբ իմքայլականների վերաբերմունքը գնահատում եմ առնվազն ագրեսիվ, բայց պատճառը չգիտեմ. ԲԴԽ նախագահ
Այդպիսի մտադրություն չունեմ: Այս մասին լրագրողների հետ ճեպազրույցում ասաց ԲԴԽ նախագահ Ռուբեն Վարդազարյանը՝ անդրադառնալով հարցին, թե հրաժարական տալու մտադրություն ունի՞:
Դիտարկմանը, որ իշխանական պատգամավորներն իրեն անընդհատ հարցեր են ուղղում իր՝ 2020-ի նոյեմբերի 15-ին արված կոչի վերաբերյալ, սակայն Վարդազարյանի պատասխանները նրանց չեն բավարարում, արդյո՞ք տեսնում է իր դեմ ինչ-որ բան, ԲԴԽ նախագահն ասաց, թե պետք է վերլուծի տեղի ունեցածը, հետո կպատասխանի հարցին:
Tert.am-ի hարցին՝ ինչպե՞ս է գնահատում «իմքայլականների»՝ իր նկատմամբ վերաբերմունքը, Վարդազարյանն արձագանքեց՝ առնվազն ագրեսիվ, սակայն պատճառը չգիտի:
Հիշեցնենք, որ Վարդազարյանը նշված օրը կոչով դիմել էր հայաստանյան դատավորներին` հորդորելով զերծ մնալ քաղաքական ճնշումներից ու ազդեցություններից։ «Այսօր, թերևս, առարկայական ու վերջնական տրվելու է շուրջ երկու տարի ողջ հանրությանը ալեկոծած և դատավորներիս համար ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»,-նշել էր նա:
Անդրադառնալով ԲԴԽ անդամ Գագիկ Ջհանգիրյանի լիազորությունների դադարեցման վերաբերյալ քննարկումներին՝ Վարդազարյանը նշեց, թե Ջհանգիրյանն աշխատում է ԲԴԽ-ում, և այս փուլում նրա լիազորությունների դադարեցման հարց ԲԴԽ օրակարգում չկա:
«Կա ընդամենը մեկ հայց. դատավորներից մեկը պարտավորեցման հայց է ներկայացրել Վարչական դատարան՝ ընդդեմ ԲԴԽ նախագահի և խնդրում է, որ դատարանը պարտավորեցնի ինձ, որ ես դադարեցնեմ Ջհանգիրյանի լիազորությունները: Սպասում ենք դատական ակտին»,-ասաց նա՝ նշելով, որ ծանոթ է հայցադիմումին, բայց քանի որ պատասխանողն ինքն է, չի ցանկանում ասել՝ հայցադիմումը հիմնավո՞ր է, թե՞ ոչ:
Հարցին՝ ինչպե՞ս է ինքն աշխատում Գագիկ Ջհանգիրյանի հետ, երբ պնդում էր, որ վերջինիս տարիքը չի համապատասխանում ԲԴԽ անդամ դառնալու համար, Վարդազարյանն արձագանքեց, թե շարունակում է համարել, որ ԱԺ-ն, անձի կենսաթոշակային տարիքը լրանալուց հետո, իրավասու չէր ընտրել Գագիկ Ջհանգիրյանին որպես ԲԴԽ անդամ: