Վեթինգ անելն ինքնանպատակ չէ. անձի լիազորություններն անհիմն դադարեցնելը կնվազեցնի պետության հեղինակությունը. Ռուբեն Վարդազարյան

ԲԴԽ-ն կոնկրետ շատ կոպիտ խախտումների դեպքում բավարարվում է միայն դատավորներին նկատողություն տալով, սա ոչ միայն չի նպաստում դատական իշխանությունում առողջ վեթինգի իրականացմանը, այլ նաև հակառակ էֆեկտ է տալիս: Ի՞նչ կարծիք ունեք սրա վերաբերյալ: Այս մասին այսօր ԱԺ-ում ԱԺ յոթերորդ գումարման վեցերորդ նստաշրջանի հերթական նիստի ժամանակ Բարձրագույն դատական խորհրդի նախագահ Ռուբեն Վարդազարյանին հարցրեց «Իմ քայլը» խմբակցության պատգամավոր Սուրեն Գրիգորյանը:

«Մենք արդեն երկու տարուց ավել է՝ խոսում ենք վեթինգի մասին, Դուք էլ եք դրա մասին բազմիցս արտահայտվել, և կարծում եմ՝ չեք վիճարկի, որ դատական իշխանության պատիվը վարկաբեկող դատավորներից ամենաառաջինը տուժում են բարեխիղճ դատավորները: Այսօր վեթինգ իրականացնելու միակ գործուն մեխանիզմը, իմ համոզմամբ, ԲԴԽ-ի կողմից իրականացվող կարգապահական վարույթների միջոցով այդպիսի դատավորների լիազորությունների դադարեցումն է: Շուրջ քսան կարգապահական վարույթի հարուցման դիմում է բերվել Արդարադատության նախարարության կողմից, երբեմն, նույն դատավորի վերաբերյալ երկու անգամ»,-ասաց նա և հավելեց, որ այդ դիմումները միայն ավարտվել են նկատողությամբ, որը ըստ նրա՝ տպավորություն է, թե մարդկանց ծաղրում են:

Վարդազարյանն արձագանքեց, թե միանշանակ համաձայն է՝ վեթինգն անհրաժեշտ է, սակայն կարծում է՝ ԲԴԽ-ին, Արդարադատության նախարարությանն ավելի լուրջ գործիքակազմ է անհրաժեշտ տալ, որպեսզի կարողանանան ավելի լուրջ ու հստակ որոշումներ կայացնեն: «Վեթինգ անելն ինքնանպատակ չէ, անհիմն անձի լիազորությունները դադարեցնելը ոչ թե կբարձրացնի դատական իշխանության կամ պետության հեղինակությունը, այլ հակառակը՝ ավելի կնվազեցնի այդ հեղինակությունը»:

Գրիգորյանը նշեց, որ կան դատավորներ, որ բնականաբար, միայն նկատողությամբ չպետք է սահմանափակվեն: