ԱՀԿ-ում հայտարարել են, որ կորոնավիրուսի դեմ հակամարմիններ են ձևավորվում Երկրի բնակչության ընդամենը 10 կամ ավելի քիչ տոկոսի մոտ

Կորոնավիրուսի դեմ հակամարմիններ ունի Երկրի բնակչության ընդամենը 10 կամ ավելի քիչ տոկոսը, հայտարարել է ԱՀԿ-ի գլխավոր գիտաշխատող Սումիա Սվամինատանը, հաղորդում է ria․ru-ն։

«Անշուշտ, որոշ տեղերում, օրինակ՝ խիտ բնակեցված քաղաքային շրջաններում, կան օջախներ, որտեղ բնակչության 50-60 տոկոսը ենթարկվել է վիրուսի ազդեցությանը և հակամարմիններ ունի։ Այնուհանդերձ, դա չի նշանակում, որ ամբողջ քաղաքի, նահանգի կամ երկրի բնակիչների մոտ համընդհանուր իմունիտետ է ձևավորվել»,- նշել է փորձագետը, ում հարցազրույցը հեռարձակվել է ԱՀԿ-ի թվիթերյան էջում։

Նրա խոսքով՝ «կորոնավիրուսի դեմ հակամարմիններ ունի երկրի բնակչության ընդամենը 10 կամ ավելի քիչ տոկոսը և համաշխարհային մասշտաբով համընդհանուր իմունիտետ և հակամարմիններ ձևավորելու միակ միջոցը պատվաստումն է»։

Նշենք, որ մեկ տարվա ընթացքում աշխարհում կորոնավիրուսով է վարակվել 114 712 543 մարդ, որից 2 543 869-ը՝ մահվան ելքով։