«Ո՞վ գիտի, գուցե որոշեմ նրանց հաղթել նաև երրորդ անգամ»․ Թրամփը հայտարարել է 2024-ին նախագահական ընտրություններին իր թեկնածությունն առաջադրելու հնարավորության մասին
ԱՄՆ նախկին նախագահ Դոնալդ Թրամփը կոչ է արել երկրում ընտրական բարեփոխումներ իրականացնել, ինչպես նաև հայտարարել է 2024 թվականին ԱՄՆ-ի նախագահական ընտրություններին առաջադրվելու հնարավորության մասին, գրում է CBS News-ը։
«Կարոտե՞լ էիք ինձ։ Այսօր ձեր առջև կանգնած հայտարարում եմ, որ մեր սկսած հիանալի ուղևորությունը դեռ չի ավարտվել»,- նախօրեին Օրլանդոյում տեղի ունեցած պահպանողական քաղաքական գործողությունների համաժողովում իր ելույթը սկսել է Թրամփը։
Նա նաև կրկնել է այն պնդումը, թե չի պարտվել 2020 թվականի ընտրություններում։
«Այս ընտրությունները կեղծվել են։ Գերագույն դատարանը և մյուս դատարանները ոչինչ չարեցին դրա դեմ։ Անհրաժեշտ է ընտրական բարեփոխումներ իրականացնել։ Չենք կարող թույլ տալ, որ նման բան էլի տեղի ունենա»,- ասել Է Թրամփը։
Սպիտակ տան նախկին ղեկավարը նաև հայտարարել է, որ 2024-ի նախագահական ընտրություններում կարող է կրկին առաջադրել իր թեկնածությունը։
«Ո՞վ գիտի, գուցե որոշեմ նրանց հաղթել նաև երրորդ անգամ», - հայտարարել է Թրամփը:
Հունվարի 6-ին Թրամփի կողմնակիցները, չընդունելով նոյեմբերի 3-ին կայացած նախագահական ընտրությունների արդյունքները, ըստ որոնց՝ հաղթանակ է տարել դեմոկրատ Ջո Բայդենը, ներխուժել էին ԱՄՆ Կոնգրեսի շենք՝ փորձելով թույլ չտալ արդյունքների վերջնական հաստատումը Սենատի կողմից: Անկարգությունների հետևանքով 5 մարդ է սպանվել:
ԱՄՆ Կոնգրեսի Ներկայացուցիչների պալատը Կոնգրեսի շենքում անկարգություններ հրահրելու մեղադրանքով հունվարի 13-ին 232 կողմ և 197 դեմ ձայներով Թրամփի նկատմամբ իմփիչմենթ էր հայտարարել:
Սակայն ավելի ուշ, չհավաքելով նախկին նախագահին իմփիչմենթի ենթարկելու համար անհրաժեշտ ձայները, Սենատն արդարացրել էր նրան։ Ընդ որում, հանրապետական 7 սենատորներ աջակցել են այդ գործընթացին, ադ թվում ՝ Մակքոնելը։