Օբաման պատմել է, որ դպրոցական տարիներին իր հասցեին ռասայական վիրավորանքի պատճառով կոտրել է համադասարանցու քիթը

Միացյալ Նահանգների նախկին նախագահ Բարաք Օբաման պատմել է դեռևս մանկության տարիներին ռասիզմի դեմ պայքարի մասին և հիշել՝ ինչպես է ռասայական վիրավորանք հնչեցնելու համար մի օր կոտրել համադասարանցու քիթը, գրում է People ամսագիրը։

Օբաման երաժիշտ Բրյուս Սփրինգսթինի «Ռենեգատներ. ԱՄՆ-ում ծնվածները» հեռուստառադիոծրագրի ժամանակ վերհիշել է, որ դպրոցական տարիքում մի ընկեր է ունեցել, որի հետ պարբերաբար բասկետբոլ են խաղացել, սակայն մի օր վիճել են, ու տղան Օբամայի հասցեին ռասայական վիրավորանք է հնչեցրել։

«Հիշում եմ՝ հարվածեցի նրա դեմքին և կոտրեցի նրա քիթը․ մենք հանդերձարանում էինք։ Ես բացատրեցի նրան, որ ինձ այդպիսի բաներ չպետք է ասի»,- հայտնել է ԱՄՆ նախկին նախագահը։

59-ամյա Օբաման իր նախագահության տարիներին և դրանից հետո բազմիցս անդրադարձել է ԱՄՆ-ում ռասայական խտրականությանը․ 2020-ին նա նամակ էր հրապարակել, որտեղ քննարկում էր՝ աֆրոամերիկացի Ջորջ Ֆլոյդի մահից հետո ինչպես կարելի է հասնել փոփոխությունների։

«Եթե առաջ շարժվենք և կարողանանք մեր արդարացված զայրույթն ուղղել խաղաղ, կայուն և արդյունավետ գործողությունների, ապա այս պահը կարող է իսկական շրջադարձային կետ դառնալ մեր ազգի՝ ամենաբարձր իդեալներին հասնելու երկար ճանապարհին»,- գրել էր նա։