«Մենք այսօր 2 բուհ վերցրինք. բազմաթիվ ուսանողներ, դասախոսներ միանում են մեր պայքարին. Թող գան ու կրակեն մեր վրա. Մեզ կրակոցներով ու բերդերով չեն կարող վախեցնել». երիտասարդների ակցիան
Ինչպես քիչ առաջ Operativ լրատվականը հաղորդեց, Փաշինյանի հրաժարականը պահանջող երիտասարդներն անհնազանդության ակցիաներ էին իրականացնում, նրանք ԵՊՀ-ում էին՝ վանկարկելով «ուսանող, միացի՛ր»:
Նիկոլ Փաշինյանի հրաժարականը պահանջող ակցիայի մասնակիցները մտան նաև Տնտեսագիտական համալսարանի ռեկտոր Դիանա Գալոյանի աշխատասենյակի ընդունարան: Այստեղ ՀՀԿ երիտասարդական թևի ղեկավար Հայկ Մամիջանյանն ասաց. «Ռեկտորին փոխանցեք. «Հայրենիքի փրկության շարժումը» պահանջում է, որ բոլոր գիտակից ու արժանապատիվ քաղաքացիները միանան շարժմանը»:
Դա ասելուց հետո նրանք դուրս եկան ընդունարանից:
Ակցիայի մասնակիցներից մեկն ասաց, որ թեև իրենց թույլ չէին տալիս մտնել բուհի տարածք, սակայն իրենք արդեն մտել են, որովհետև «Հայաստանում իշխանությունն արդեն պատկանում է արժանապատիվ հայ ժողովրդի արժանապատիվ հայ երիտասարդներին: Մենք փորձեցինք այցելել ռեկտորին, պրոռեկտորներին, որ հասկանանք, թե ինչու թույլ չեն տալիս երիտասարդները մտնեն բուհի տարածք, բայց նրանք այստեղ չեն:
Ակցիայի մասնակիցները մտնում էին լսարաններ, որտեղ դասապրոցես է ընթանում և կոչ անում միանալ իրենց պայքարին՝ հեռացնելու այս իշխանություններին:
Ներկաներից մեկը գրատախտակին գրեց «Նիկոլ դավաճան»:
Քիչ անց նրանք դուրս եկան Տնտեսագիտական համալսարանի շենքից:
«Մենք այսօր 2 բուհ վերցրեցինք, երկու բուհ մտանք և արձանագրեցինք, որ բազմաթիվ ուսանողներ, դասախոսներ միանում են մեր պայքարին: ԵՊՀ ռեկտորի պաշտոնակատարը համաձայնեց, որ պետք է իշխանությունները հեռանան: Մենք ցանկացած շենք, ցանկացած կառույց երբ ուզենանք, կմտնենք և դուրս կգանք: Թող գան ու կրակեն մեր վրա: Մեզ կրակոցներով ու բերդերով չեն կարող վախեցնել»,-ասաց ակցիայի մասնակիցներից մետ:
Հաղորդվեց, որ այսօրվա ակցիան ավարտվում է:
Նշենք, որ ԵՊՀ կենտրոնական մասնաշենքում բողոքի ակցիա իրականացնող երիտասարդները դուրս եկան շենքից: Մինչա այդ շենքի մոտ հավաքված ոստիկանները հեռացան:
Նրանք «Նիկոլ դավաճան», «Նիկոլ հեռացիր» վանկարկումներով շարժվել էին դեպի Տնտեսագիտական համալսարանի շենք: Այստեղ դարպասները փակ էին: Երիատասադրներից մեկը բարձրացավ դարպասների վրա, մյուսները փորձում էին ուժով բացել դարպասները: Ոստիկանների և ակցիայի մասնակիցների միջև քաշքշուկ տեղի ունեցավ:
Ոստիկաններին օգնության հասան «կարմիրբերետավորները»: Նրանք սկսեցին ուժով հետ հրել երիտասարդներին:
Ակցիայի մասնակիցներից մեկը հայտարարեց. «ոստիկանությունը ներկայացրեց, որ դարպասները փակելու որոշումը բուհի ղեկավարությանն է: Մենք այստեղից տեղ չենք գնա, քանի որ բուհի ղեկավարությունն իրավունք չունի սահմանափակելու մեզ բուհի տարածք մտնելու համար: Ստացվում է, որ բոհի ղեկավարությունը ներսում գտնվող ուսանողներին գերի է վերցրել եւ դրսում գտնվող ուսանողներին թույլ չի տալիս մտնել բուհ»:
Ակցիայի մասնակիցները շրջանցեցին շենքը և մեկ այլ մուտքից ներս մտան, որը բաց էր: