Գործը գտնվում է ՔՊ-ի վերահսկողության տակ. փոխգնդապետին ծեծելու գործով մեղադրյալին փորձում են գրավով ազատ արձակել
Եղեգնաձորում 2019 թվականի սեպտեմբերի 17-ին մի խումբ անձանց կողմից դաժան ծեծի ենթարկված ՀՀ ԶՈՒ փոխգնդապետ Արա Մխիթարյանի վերաբերյալ քրեական գործից անջատված մասով մեղադրյալի կարգավիճակ ստացած Հարություն Գրիգորյանին կալանքից գրավով ազատելու միջնորդություն է ներկայացվել ՀՀ վերաքննիչ քրեական դատարան։
Նշենք, որ գործով մեղադրյալ Հարություն Գրիգորյանը Վայոց ձորի մարզի նախկին մարզպետ Տրդատ Սարգսյանի օգնականն է եղել։
Միջնորդության քննությունը տեղի կունենա փետրվարի 25-ին, ժամը 15։00-ին՝ դատավոր Ռուզաննա Բարսեղյան նախագահությամբ։
NEWS.am-ի հետ զրույցում գործով տուժողի իրապաշտպան Արտակ Գալստյանն ասաց, որ պաշտպանական կողմը գրավի միջնորդություն են ներկայացրել առաջին ատյանի դատարան, որը մերժվել է։
Նշենք, որ անջատված մյուս մասը դեռեւս նախաքննության փուլում է եւ այդ գործով մյուս մեղադրյալ Զավեն Գրիգորյանը Վերաքննիչ դատարանի որոշմամբ գրավով ազատ է արձակվել։
«Այդ դեպքով մյուս մեղադրյալը կապ չունի այդ գործի հետ, որովհետեւ մայր գործից մաս է առանձնացվել ու ուղարկվել դատարան։ Իմ կարծիքով՝ այնպես են արել, որ այս գործը կոծկեն, որովհետեւ մարդուն խմբակային ծեծում են, երկու մեղադրյալներն էլ հայտնի են, մեկին թողում են նախաքննության մեջ, մյուսին առանձնացնում ու ուղարկում դատարան։ Մեղադրանքի ծավալի մեջ առանձնացված մասն այստեղ նույնպես կա։ Եթե այս գործով դատարանը ապացույցներին որոշակի գնահատական է տալիս, սա ավտոմատ կերպով կարող է ազդել նաեւ մայր գործի վրա, որը դեռեւս դատարանում չի։ Այս պարագայում ինչքան էլ այն կողմն ասում է՝ մեկին բաց են թողել, մյուսին ինչու բաց չեն թողում, ասեմ, որ մեկը նախաքննության փուլում է, իսկ այդ մեղադրյալը դատաքննության փուլում է արդեն»,- ասաց Գալստյանը։
Իրավապաշտպանը պատմեց՝ քննությամբ ձեռք բերված տվյալներ կան, որ մեղադրյալ Հարություն Գրիգորյանը նախաքննության փուլում փորձել է ազդել գործով վկաներից Ժորայի վրա, որ իր օգտին ցուցմունք տա. «Այսինքն՝ մենք ունենք նաեւ փաստական տվյալ այն մասին, որ մարդը գտնվելով ազատության մեջ փորձել է խոչընդոտել գործի քննությանը»։
Նա ասաց, որ դատաքննության փուլում այդ անջատված մասով վկաներից հարցաքննվել է երկուսը։
«Սույն քրեական գործը գնում է ՔՊ-ի վերահսկողության տակ, փորձում են ամեն ինչ անել, որ գործը կարճեն։ Հավ գողացողին կալանավորում են, իսկ այս ծանր հանցանքի դեպքում ուզում են ազատ արձակել»,- ասաց իրավապաշտպանը։
Այդ միջադեպից հետո մամուլում տեղեկություններ շրջանառվեցին այն մասին, որ ծեծկռտուքին մասնակցել է Տրդատ Սարգսյանը, սակայն ՀՀ քննչական կոմիտեն հերքեց այդ լուրը։
Հիշեցնենք, որ ծեծկռտուքից մի քանի օր անց Տրդատ Սարգսյանը հրաժարական ներկայացրեց Վայոց ձորի մարզպետի պաշտոնից:
Այս պահին Տրդատ Սարգսյանը նշանակվել էր «Քաղաքացիական պայմանագիր» կուսակցության աշխատակազմի ղեկավար:
Նշենք, որ փոխգնդապետ Մխիթարյանը գտնվում է կոմայի մեջ, նրան տեղափոխել են տուն։
Հիշեցնենք, որ Գրիգորյանին մեղադրանք է առաջադրվել՝ ՀՀ ՔՕ 112-րդ հոդվածի (դիտավորությամբ առողջությանը ծանր վնաս պատճառելը) 2-րդ մասի 6-րդ կետով եւ 118-րդ հոդվածով (ծեծ):