Հայրենավաճառ վարչապետին պաշտպանող իրավապահներն ապազգային ոչնչություններ են և շուտով դատվելու են ակնհայտ ապօրինի հրամաններ կատարելու համար. Տիգրան Աթանեսյան (տեսանյութ)

Ոստիկանությունը խայտառակ գործառույթ է իրականացնում, նրանք պաշտպանում են մեկին, որը վաճառել է մեր հայրենիքը, մեր հասարակության ախտերը դուրս են եկել ջրի երես, մի կտոր լափի համար պատրաստ են անտեսել իրենց զոհված ծառայակիցների արյունը. ոստիկանները չպետք է ակնհայտ ապօրինի հրամաններ կատարեն, ի վերջո՝ գոյություն ունի հասարակական կարգ և հանցավորության դեմ պայքար: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել փաստաբան Տիգրան Աթանեսյանը:

«Ինձ թվում էր՝ մարդը, որը քրեական պատասխանատվության է ենթարկվել, երկու տարի ազատազրկման վայրերում է եղել, եթե երբևէ լինի մի դերում, ուր կարող է ազդել համակարգի վրա, պետք է ամեն ինչ անի, որ բացառվեն անարդարությունները: Բայց նա հաճույքով վրեժխնդիր է լինում բոլորից, հրահանգներ է իջեցնում դատարանների նախագահներին, օրինակ՝ Արթուր Մկրտչյանին, ընդ որում՝ բացահայտորեն՝ սրճարանում, բոլորի ներկայությամբ: Երկրի առաջնորդը ցինիզմի հայրերից է, դա վարակել է ամբողջ պետական ապարատին, արդեն թաքցնելու ոչինչ չկա»,- ասել է փաստաբանը:

Ըստ Աթանեսյանի՝ երբեք չի կարելի ներել օրինախախտ ոստիկաններին, նրանք մտածում են՝ ո՞ւմ են առայսօր պատժել, իրենց էլ չեն պատժի, մինչդեռ պետք է պատժել վերջնական ջրբաժանից՝ նոյեմբերի 9-ից հետո այս իշխանությանը ծառայություն մատուցողներին. «Սրանք հպարտանալու ոչինչ չունեն, ապազգային ոչնչություններ են, որոնցից պետք է ազատվել: Հաջորդ իշխանությունը պետք է օրենքի տառին համապատասխան պատժի ակնհայտ ապօրինի հրաման կատարողներին: Չարիքի իշխանության տակ ենք, չկա որևէ արդարացում: Մենք գործ ունենք Երևանի խանության վերարտադրության հետ, մարդը բացահայտ թքել ու անցել է Սահմանադրության վրայով, կատարել է սահմանադրական հեղաշրջում, տալիս է ապօրինի հրամաններ, ցավոք՝ կատարողներն են շատ»:

Փաստաբանի կարծիքով՝ ժողովրդի ցասման դեմ Փաշինյանին պաշտպանող չի լինելու, թեև նա կարծում է, որ «թուլափայ» շպրտելով ոստիկաններին՝ ինքը պաշտպանված կլինի. «Ժողովրդի վրա կրակելու աներկբա սպառնալիքներ կան, դա ասում են մարդիկ, ովքեր գիտեն, որ իրենց վիճակն իշխանափոխությունից հետո շատ վատ է լինելու: Նրանք գնացել են սատանայի, չարիքի հետևից, որը վաճառել է հայրենիքը, և իրենք էլ դրա պատասխանատուն են, հիմա սարսափն իրենց ուտում է, որ պետք է պատասխան տան: Եթե բարոյականություն ունենային, այդտեղ չէին հայտնվի: Շատ մարդիկ կան, որոնք այս ազգադավին օգնել են, ձեռք են մեկնել, բայց եթե մի քիչ խելք ու խիղճ ունեին, պետք է հասկանային՝ ով է նա»:

Փաստաբանի պնդմամբ՝ կենցաղային մանր հարցերից մինչև քաղաքական հայտարարություններ՝ այս իշխանության ամեն բառը սուտ է: «Սահմանադրությունը վաղուց ոչնչացված է, խելք ունենային, սթափ մտածեին՝ վաղուց գնացած կլինեին: Ստիպում են, որ այս խաղաղ բողոքը վերածվի զինված ակցիաների: Այդ ոստիկաններն առաջին կրակոցից թողնելու են փախնեն: Ղալաթ կանի կրակողը, ոչ ոք էլ չի կրակի ժողովրդի վրա, Անդրանիկ Քոչարյանի պես սրիկաներին պետք չէ լսել»,- ամփոփել է Տիգրան Աթանեսյանը: