Չինաստանն ավարտել է 2022-ին կայանալիք Օլիմպիական խաղերի համար բոլոր մարզական կառույցների շինարարությունը
Չինաստանում ավարտել են 2022-ին կայանալիք Ձմեռային օլիմպիական խաղերի և Պարալիմպիկ խաղերի համար մարզական կառույցների շինարարությունը, հաղորդում է rg.ru-ն։
Նշվում է, որ մարզիկները մրցելու են Պեկինում, Յանցինում և Չժանցզյակոուում գտնվող 25 մարզադաշտերում: Քանի որ Խաղերն անցկացվելու են շրջակա միջավայրի պահպանության նշանաբանի ներքո, բոլոր կառույցները արդիականացվել են էկոտեխնոլոգիաների օգտագործմամբ։
Նշվում է նաև, որ Օլիմպիադայում առաջին անգամ կօգտագործվի սառույցի պատրաստման հատուկ տեխնոլոգիա։ Բացի այդ, հրատարակության տվյալներով՝ կառույցներում ակտիվորեն ներդրվում են 5G ցանցի վրա հիմնված տեխնոլոգիաներ․ «խելացի» մարզական կառույցները կունենան կողմնորոշման համար նախատեսված համակարգ, ինչը թույլ կտա խուսափել այցելուների կուտակումներից:
«Այդպիսի կառույցներից մեկը ազգային չմշկավազքի կենտրոնն է։ Սպասվում է, որ կենտրոնում գործարկվելու է հատուկ բջջային հավելված, որի օգնությամբ հնարավոր կլինի ոչ միայն հեշտ կողմնորոշվել շինության ներսում, այլև, անհրաժեշտության դեպքում, օգտվել թարգմանչի ծառայություններից»,-ասված է թերթում։