Նիկոլն իր թիմում ամեն մեկին մի քանի 10-նյակ հազար դոլար տվել է, որ դուրս չգան «Իմ քայլից». Պետք է պատրաստ լինել կայծակնային արագությամբ ապստամբելով վերցնել իշխանություն. Վազգեն Մանուկյան

Երբ 2018-ին հայտնվեց մարդկանց մի խումբ, որն ասաց՝ մենք արդար պետություն կկառուցենք, որտեղ չի լինի կոռուպցիա, կլինի հավասարություն, ժողովրդի մի մեծ հատված մտածեց, որ դա այն է, ինչի համար մենք պայքարում էինք: ՈՉ: Այս մասին, այսօր՝ փետրվարի 20-ին, Ազատության հրապարակում ընթացող հանրահավաքի ժամանակ հայտարարեց «Հայրենիքի փրկության շարժման» վարչապետի թեկնածու Վազգեն Մանուկյանը:

Նշենք, որ հանրահավաքը մեկնարկեց շեփորի հնչյունների ներքո. Հնչեց այն մեղեդին, որը հնչում էր 1988-ի ղարաբաղյան շարժման ժամանակ:

«Ասում են՝ մեզ խաբեցին: Ոչ, չխաբեցին, մենք խաբվեցինք, որովհետև եթե մենք կարդայինք, թե այդ մարդիկ ինչ են գրում նախորդ տարիներին, մենք և դուք, սիրելի քաղաքացիներ, երբեք այդ ճանապարհով չէինք գնա: Ի՞նչ ունենք մենք հիմա 3 տարի հետո.

Ողբերգություն, կորցրեցինք գրեթե ամեն ինչ, պարտվեցինք պատերազմում, բանակը ջարդվեց, մեր ռազմականհաղթանակները ոչնչացան, պետությունն անկախ չէ, մեր անվտանգությունն ապահովում է Ռուսաստանը, այդ առումով մենք լրիվ դառնում ենք կախված Ռուսաստանից: Սրանք մտածում են՝ գնան քծնեն Պուտինին, տակից իրենց ուզածն անեն, դա ընկերություն կլինի: Ոչ, դա ընկերություն չի, անգամ բակի խաղերի մեջ դա չէր անցնում»,-հայտարարեց Վազգեն Մանուկյանը:

Նա ընդգծեց, որ Հայաստանը դառնում է ոստիկանապետություն, ձերբակլում են ամենաազնիվ, երկրին նվիրված մարդկանց. «Մենք այսպիսի պետության մեջ էին քուզում ապրե՞լ: Ի՞նչ է կատարվում տնտեսության մեջ: Մեր ժողովրդի վիճակը լավացա՞վ: Բացարձակապես ոչ: Կոռուպցիան վերացա՞վ: Ինձ ասում են, որ Նիկոլ Փաշինյանն իր թիմակիցներին ամեն մեկին մի քանի տասնյակ հազար դոլար տվել է, որ դուրս չգան «Իմ քայլից»: Կստուգենք, ճիշտ է թե ոչ»:

Նա համոզմունք հայտնեց, որ հնարավոր է այս վիճակից դուրս գալ.

«Բայց դրա համար կա նախապայման, այս վարչախումբը պետք է դուրս շպրտվի: Դրանից հետո նոր կսկսվեն իրական քայլերը: մենք ոչ միայն պետք է վերականգնենք այն ամենը, ինչ կորցրել ենք, այլ դրա վրա պետք է կառուցենք մեր երազած պետությունը:Եթե ՆԻկոլ Փաշինյանը գնա, բայց գան մարդիկ, որոնց համար իշխանական տենչը, փողը անհավասարությունը, ընտրություններին կեղծիքը մնան, մենք ոչ մի նպատակի չենք հասնի, նորից մի նոր Նիկոլ կառաջանա: Ես առաջարկում եմ պլան Ա և պլան Բ: Առաջինը. Ինչ ցույցեր էլ անենք, Նիկոլ Փաշինյանը իշխանությունն ինքնակամ չի թողնելու: Ես նախանձով եմ նայում Վրաստանին, որտեղ վարչապետը փոքր դեպքի համար սկզբունքից ելնելով հրաժարական տվեց: Սա հրաժարական տվողը չի: Ուրեմն պետք է ջարդել այն հենարանները, որն ինքը ունի: Այդ հենարաններից առաջինը մեր հայրենակիցներից այն հատվածն է, որը չի գիտակցում, թե երկիրն ուր է գնում: Սպասում է դժբախտությունը գա, չոքի իր տան դիմաց: Մինչեւ չչոքի, չի հասկան: Մեր պարտքն է նրանց հայտարարել, թե ինչ է կատարվում, ինչ է լինելու»,-ասաց նա:

Վազգեն Մանուկյանի խոսքով, երկրորդ հենարանը ուժային կառույցերն են՝ ոստիկանություն, ԱԱԾ. «Նրանք երբեմն իրենց շահից ելնելով իրենց համոզում են, որ իրենք իրենց պարտքն են կատարում՝ առանց գիտակցելու, որ ծառայելվ այս իշխանությանը, ծառայում են թուրքական ծրագրին: Մենք պետք է կոշտ լինենք իրենց հետ, համոզենք, եւ միշտ թողնենք նահանջի ճանապարհ: Համոզված եղեք, որ եթե հսկայական ժողովուրդ երկար ժամանակ կանգնի քաղաքում, իրենք կմիանան ժողովրդին:

Երրորդը այն պատգամավորներն են, որոնք հենարան են Նիկոլ Փաշինյանին ԱԺ-ում: Նրանց հետ էլ պետք է լինել կոշտ, համոզիչ եւ միշտ թողնել նահանջի ճանապարհ:

Հայաստանը պետք է եռա, ամեն օր պետք է լինեն ցույցեր, պարալիզացվի քաղաքը, լինեն գործադուլներ: Ավտոշարայսյուներով պետք է պտտվել ամբողջ Հայաստանով, ոտքի հանել մարդկանց եւ ջարդել այն հենարանները, որոնց վրա հենվում է Նիկոլ Փաշինյանը»մ-ասաց նա:

Վազգեն Մանուկյանը հավելեց, որ կա նաեւ պլան Բ. «Ցանկացած պահի, դա կլինի այսօր, կարող է լինել մեկ շաբաթից, 10 օրից, պետք է պատրաստ լինել կայծակնային արագությամբ ապստամբելով վերցնել իշխանություն: Մենք գնալու ենք Ա ճնպարհով՝ միշտ պատրաստ լինելով Բ ճանապարհին: Բայց պետք է դրա համար տեղերում կազմակերպվեն կոմիտեներում, բոլոր գյուղերում, կոլեկտիվներում պատրաստվեք, ժողովուրդ: Մենք միասնական ենք գնալու»,-հայտարարեց Վազգեն Մանուկյան:

Իհարկե, ըստ Վազգեն մանուկյանի, ոչ մեկս համաձայն չենք նոյեմբերի 9-ին ստորագրված եռակողմ հայտարարության հետ, բայց չենք կարող չեղարկել, որովհետև դրա հետևում կանգնած է պատերազմ, որը մեզ պետք չի և որին մենք հիմա պատրաստ չենք: 

«Բայց կգա ժամանակը և այդ փաստաթուղթը կփոխվի էապես: Մի բան փաստաթղթում արդեն պետք է փոխել: Այն ճանապարհները, որոնք անցնելու են Զանգեզուրով, Հայաստանի տրածքի բոլոր ճանապարհները պետք է վերահսկվեն միայն ու միայն Հայաստանի կողմից: Ոչ մի ուրիշ պետություն իրավունք չունի վերահսկել մեր ճանապարհները»,-ասաց նա: