Աբսուրդային իրավիճակ Աբովյանի թիվ մեկ Ավագ դպրոցում. 370 աշակերտից հարյուրը դպրոցից հեռանալու դիմում է գրել. Բացառիկ հարցազրույց դպրոցի պատմության ուսուցիչ Հայկ Փայտյանի հետ

Ինչպես քիչ առաջ Operativ լրատվականը հաղորդեց, Աբովյան քաղաքի թիվ 1 ավագ դպրոցում այսօր էլ գործադուլ և դասադուլ էր՝ նորանշանակ տնօրեն Քարմիլե Առաքելյանի հրաժարականի պահանջով։ Դպրոցի պատմության ուսուցիչ Հայկ Փայտյանը ֆեյսբուքյան ուղիղ եթերով հաղորդել էր, որ այսօր ծնողները դպրոց են եկել, որպեսզի երեխաներին դպրոցից հանելու դիմուներ գրեն:

Operativ լրատվականի թղթակիցը զրուցել է դպրոցի պատմության ուսուցիչ Հայկ Փայտյանի հետ՝ մանրամասն պարզելու դպրոցում տիրող իրավիճակը:

- Հա՛յկ, արդեն տևական ժամանակ է դասապրոցեսը կաթվածահար վիճակում է, արդյունքում այսօր Դուք ահազանգեցիք, որ ծնողները եկել էին դպրոց՝ դիմում գրելու, որպեսզի ուսումնական տարվա մեջտեղում հանեն իրենց երեխաներին կրթական այս օջախից: 

- Նախ ասեմ, որ սույն թվականի հունվարի 22-ին դպրոցում տեղի ունեցան գործադիր տնօրենի ընտրություններ, ձայները բաշխվեցին հավասար՝ 4-4, թեկնածուները երկուսն էին՝ գործող տնօրենը և Քարմիլե Առաքելյանը: Բայց մինչև ընտրությունները, դեռ մեկ տարի առաջ մեր խորհրդի կազմը, ավելի ճիշտ այն չորս հոգին, ովքեր ներկայացնում էին նախարարությունը, փոխվել էին, նշանակվել էին այդ ժամանակվա Կոտայքի արդեն նախկին մարզպետ Ռոմանոս Պետրոսյանի քենին, եղբոր կինը, մարզպետ եղած ժամանակ նրա օգնական թե խորհրդական Չիլինգարյանը և ևս մեկ մարզպետարանի աշխատող: Հաշվի առնելով այն, որ Կոտայքի մարզում արդեն բազմաթիվ նման երևույթների էինք ականատես եղել, երբ խորհրդի կազմը փոխվել էր, և նույն մարդիկ այլ դպրոցների խորհրդի կազմում էլ էին ընդգրկվել, ասենք օրինակ, նույն պաշտոնյայի կինը չորս կառավարման խորհրդի անդամ էր, նրա եղբոր կինը նույնպես երեք թե չորս կառավարման խորհրդի անդամ, ավելին, մենք գիտեինք, թե ինչ էր եղել Չարենցավանում, Արամուսի դպրոցում, արդեն իսկ խորն անհանգստություն ունեինք, որ տեղի է ունենում ուղղորդված ընտրություն, ինչպես այդ դպրոցներում: Ինչն էլ հենց եղավ:

Նորանշանակ տնօրենի զարգացման ծրագիրը բազմաթիվ թերություններ ուներ: Այս տնօրենը՝ Քարմիլե Առաքելյանը, հիմնական դպրոցի ուսուցչուհի է, իսկ հիշեցնեմ, Աբովյանի թիվ մեկ դպրոցը ավագ դպրոց է հանդիսանում, նա ավագ դպրոցում աշխատելու փորձ չունի, էլ ուր մնաց՝ կառավարելու: 4-4-ի դեպքում, երբ մենք գիտեինք, որ ըստ գործող կարգի պետք է տնօրեն նշանակի նախարարը, 370 աշակերտից բաղկացող դպրոցի 300 աշակերտից ավելին և այդքան ծնող, ամբողջ մանկավարժական կոլեկտիվը գրեցինք դիմում-խնդրագրեր նախարարին, և ընտրությունից երեք օր հետո՝ հունվարի 25-ին, իրազեկման ակցիա արեցինք ԿԳՄՆՍ շենքի դիմաց, որպեսզի մեզ հարցնեն և հաշվի առնեն մեր հիմնավորումները, թե ում ենք ուզում տեսնել դպրոցի տնօրեն և ինչու:

Ծնողական խորհրդի ներկայացուցչի, աշակերտական խորհրդի ղեկավարի և ուսուցիչներից մեկի հետ հանդիպեց փոխնախարար Անդրեասյանը, լսեց հիմնավորումները, վստահեցրեց, որ երկու թեկնածուներին էլ կհրավիրի իր մոտ, վերջում նոր կորոշի, թե ով կլինի դպրոցի տնօրենը: Հրավիրել էր նրանց, երկու թեկնածուներն էլ ներկայացրել էին իրենց զարգացման ծրագրերը, այնուհետև եկավ հրամանը:

Բայց հատկապես ուզում եմ նշել, որ մինչև հրամանը Հանրակրթության վարչության աշխատողը զանգել էր մեր արդեն նախկին տնօրեն Մետաքսյա Բաբայանին, և հենց այսպիսի տեքստով ասել՝ «Տիկին Բաբայան, դո՞ւք եք», լսելով՝ «Այո, ես եմ», շարունակել՝ «Ձեզ շնորհավորում ենք, նախարարը Ձեզ է վերանշանակել, մի ժամվա մեջ եկեք, որպեսզի հրամանը ստրագրենք»:

Մինչ ընկեր Բաբայանը տեղեկացնում է, որ նման բան է տեղի ունեցել, մենք ուրախանում ենք և այլն, մոտ 15-20 րոպե հետո զանգում և տեղեկացնում են՝ բա նույն հանրակրթության վարչության աշխատակիցը զանգահարել է Բաբայանին և ասել՝ «Վայ, գիտեք, կներեք, սխալմունք է տեղի ունեցել, մի խոսքով, նախարարը մյուս թեկնածուին է նշանակել»:

- Այսինքն 15 րոպեում որոշումը փոխեցի՞ն:

- Դե այդպես է ստացվում: Բնականաբար դա ահավոր զայրույթի ու բողոքի ալիք բարձրացրեց, այսքան մեր խնդրագրերը, մեր հիմնավորումները, ոչինչ ու ոչ ոքի հաշվի չառան հրամայողները: Հանրակրթության վարչության զեկույցում, ընդ որում, անանուն, գրված էր հետևյալը՝

«Հաշվի առնելով, որ դպրոցի նորանշանակ տնօրենը՝ Քարմիլե Առաքելյանը, ավարտել է Խաչատուր Աբովյանի անվան մանկավարժական համալսարանը, 1994 թվականից աշխատում է որպես մանկավարժ, համատեղությամբ եղել է գրադարանավար, ունի զարգացման ծրագիր, առաջարկում ենք նշանակել իրեն: Մեզ համար այդ հիմնավորումը, ճիշտն ասած, ֆանտաստիկայի ժանրից էր»:

- Հա՛յկ, այսօր Ձեր Ֆեյսբուքյան լայվի ժամանակ տնօրենի հետ դահլիճում հանդիպած ծնողները բողոքներ էին հնչեցնում, թե՝ «Դուք ասացիք՝ դասապրոցեսը կվերականգնվի, բայց այն չի վերականգնվել», այսինքն՝ ուսուցիչները և՞ս չեն համաձայնում այս տնօրենի հետ աշխատել և դասեր չեն կայանու՞մ:

- Այո՛: 26 ուսուցիչ ենք, մեկ ուսուցիչ նորանշանակ տնօրենի մորաքրոջ աղջիկն է, նա դիմում է գրել և ազատվել աշխատանքից, և մենք ճիշտ չենք էլ համարել նրան այս ամենի մեջ ընդգրկելը, քանզի նրանք վերջիվերջո, բարեկամներ են,  իսկ իր ազատվելը նա հիմնավորել է, որ չի կարող այս կոլեկտիվում և մթնոլորտում աշխատել, մյուս բոլոր մանկավարժները մեկ մարդու նման փետրվարի 4-ին հայտարարեցինք, որ նախարարին ենք պահանջում, որպեսզի հանդիպենք ու հասկանանք այս նշանակման բուն պատճառը, մեզ ոչ ոք բանի տեղ չդրեց, եթե կադրերը տեսել եք, ոստիկանական ուղեկցությամբ նորանշանակ տնօրենին մտցրին դպրոց, մենք դպրոցից դուրս եկանք, մեր նկատմամբ ծանուցումներ եղան, Ոստիկանություն հրավիրեցին բողոքողներին, անգամ Կառավարության դիմաց ենք ակցիաներ արել, բայց երբ տեսանք, որ այդ ամենը անարդյունք է, փետրվարի 3-ին մանկխոր նիստը որոշում կայացրեց՝ որ գնում ենք գործադուլի: Քանի որ այդ պահին դպրոցում արհմմիություն չունեինք, տեղեկացրինք նաև Հանրակրթության վարչությանը, որ որոշել ենք գնալ այդ քայլին:

Փետրվարի 11-ից, մեր իրազեկման համաձայն, ուսուցիչները գտնվում են գործադուլում:

Բնականաբար ծնողները սկսեցին անհանգստանալ, առանց այդ էլ ամեն օր գալիս էին և հետաքրքրվում, թե ինչ է լինելու, ինչ անել, եթե դասապրոցես չկա, և, ինչքան տեսնում եք, հույս էլ չկա, որ կլինի: Ծնողները որոշեցին դիմել նման քայլի և գրել դիմումներ՝ իրենց երեխաներին դպրոցից հանելու կապակցությամբ: Շեշտեմ, որ անընդհատ ծնողները փորձել են հանդիպել նորանշանակ տնօրենին, նա չէր հանդիպում: Հավելեմ, որ ծնողներ կան, զանգում են անգամ նախարարություն, ասում, որ այս վիճակն է, դասապրոցես չկա, բայց այնտեղ զարմանում են կամ անտեղյակ ձևանում: 

Գիտեք, ամենացավալին այն է, որ Նախարարությունը թքած ունի այս ամենի վրա, անգամ մեզ անվանում են Աղմկողներ, չգիտեմ ինչեր, իսկ երբ մենք հարց ենք բարձրացնում, թե ինչ հիմունքներով կատարվեց այդ ընտրությունը, մեզ անգամ աբսուրդային բացատրություններ են բերվում, թե նախկինում դպրոցում կային քաղաքականացվածության տարրեր, և նոր տնօրենի ընտրությունը եղավ բացառման հիմքով՝ նախկինին բացառեցի, նորին ընտրեցի:

- Հա՛յկ, իսկ ի՞նչ իրավիճակ է այժ, ի՞նչ պատասխան տվեց Քարմիլե Առաքելյանը բորբոքված և դիմում գրող ծնողներին:

- Տնօրենը ծնողներից խնդրել է կարծեմ մեկ, թե երկու օր ժամանակ, որպեսզի կամ պատասխանի, կամ նրանց դիմումները ընդունի և հրաման տա երեխաներին հեռացնելու:

- Իսկ թվե՞ր ունեք, այս պահի դրությամբ քանի՞ ծնող է դիմում գրել:

- Ինչպես նշեցի դպրոցն ունի 370 աշակերտ, մոտավորապես հարյուր դիմում կա այս պահին: