Մեր իշխանությունը վատ ժառանգություն է ստացել. ի՞նչ պետք է արվեր, գնայինք այդ բանակցությունների ճանապարհո՞վ, որով գնացել էր Սերժ Սարգսյանը. Հրաչյա Հակոբյան
Երբ ասում է, որ ենթադրենք, 2018-ին տեղի ունեցած գործընթացը հակաղարաբաղյան շարժում էր, պետք է դրան ինչ-որ ապացույցներ լինեն։ Ես էլ կարող եմ ասել, որ Սերժ Սարգսյանի կառավարման 10 տարիները հակաղարաբաղյան կառավարում էր, որովհետև այդ տարիների ընթացքում լուրջ, խոշոր ներդրում Արցախում տեղի չի ունեցել: Այս մասին այսօր ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Հրաչյա Հակոբյանը՝ անդրադառնալով «ԱրմՆյուզ» հեռուստաընկերությանը ՀՀ երկրորդ նախագահ Սերժ Սարգսյանի տված հարցազրույցին։
Դիտարկմանը, թե նախկին իշխանության օրոք, օրինակ, Արցախում ճանապարհներ են կառուցվել, պատգամավորն արձագանքեց, թե կարող էր ավելին լինել: Անդրադառնալով երկրորդ նախագահի այն հայտարարությանը, թե երկու տարի շարունակ Նիկոլ Փաշինյանը բանակցությունները փակուղի տարավ, երբ պայման էր դնում, որ Արցախը պետք է բանակցությունների կողմ լինի՝ արհամարհելով համանախագահներին, Հակոբյանը նկատեց.
«Ներողություն, ո՞ր բանակցային գործընթացը, որ 7 շրջանները պետք է վերադարձվեն Ադրբեջանի՞ն, այդ բանակցային գործընթա՞ցը, ստոպ տվե՞ց և նոր բանակցային գործընթաց սկսե՞ց: Ներողություն, իսկ ի՞նչ պետք է արվեր, գնայի՞նք այդ բանակային ճանապարհով, որով գնացել էր Սերժ Սարգսյանը: Մեր իշխանությունը իհարկե վատ ժառանգություն է ստացել»։
Պատգամավորի պնդմամբ՝ եթե բանակցություններն այդ ճանապարհով էին գնում, ապա ինչո՞ւ ժողովրդին չէին պատրաստում դրան. «Ինչո՞ւ, օրինակ, գնում, բանակցում էին, որ պետք է այդ 7 շրջանները վերադարձվեն, բայց գալիս այստեղ ասում էին՝ ոչ մի թիզ թշնամուն։ Եթե այդպիսի գործընթաց, բանակցություններ էին տեղի ունենում, պետք էր ուղղակի, համահունչ տրամադրություն ստեղծել հանրության մոտ»։