ԵՄ-ում հայտնել են, որ ի գիտություն են ընդունել Լավրովի՝ ԵՄ-ի հետ հարաբերությունները խզելու պատրաստակամության մասին հայտարարությունը
Եվրամիությունում ի գիտություն են ընդունել ՌԴ ԱԳ նախարար Սերգեյ Լավրովի՝ ԵՄ-ի հետ հարաբերությունների մասին խոսքերը, ինչպես նաև այդ կապակցությամբ Կրեմլի մեկնաբանությունները, հայտարարել է Եվրոպական արտաքին քաղաքական ծառայության պաշտոնական ներկայացուցիչ Պիտեր Ստանոն, փոխանցում է ria.ru-ն։
«Մենք ի գիտություն ենք ընդունել պարոն Լավրովի արտահայտություններն ու Կրեմլի պարզաբանումները։ Անկախ այդ արտահայտություններից՝ ԵՄ-ի և Ռուսաստանի հարաբերությունների վիճակը լավ չէ։ Մենք ցանկանում ենք Ռուսաստանի հետ հարաբերությունները կառուցել մեր արժեքների, մեր շահերի, միջազգային իրավունքի և այն պարտավորությունների վրա, որոնք մենք ստանձնել ենք, օրինակ՝ միջազգային կազմակերպությունների շրջանակներում։ Բայց մենք հավատարիմ ենք նաև բարիդրացիության սկզբունքի կարևորությանը»,- Բրյուսելում կայացած ճեպազրույցի ժամանակ ասել է Ստանոն։
Նա հավելել է, որ այդ մասին Լավրովին հայտնել է նաև ԵՄ դիվանագիտության ղեկավար Ժոզեպ Բորելը։
«Մենք այս համատեքստում կողմ ենք այն հարաբերություններին, որոնք ձեռնտու են երկու կողմերին»,- հավելել է ԵՄ ներկայացուցիչը:
Ավելի վաղ ՌԴ ԱԳ նախարար Սերգեյ Լավրովը հայտարարել էր, որ Ռուսաստանը պատրաստ է Եվրամիության հետ խզել իր հարաբերությունները, եթե վերջինս ևս մեկ անգամ ինչ-որ ոլորտներում պատժամիջոցներ կիրառի։
«Դա տեղի կունենա, եթե ևս մեկ անգամ ինչ-որ ոլորտներում պատժամիջոցներ կիրառվեն, որոնք ռիսկեր են ստեղծում մեր տնտեսության համար, այդ թվում՝ ամենազգայուն ոլորտներում։ Մենք չենք ուզում մեկուսանալ համաշխարհային կյանքից, բայց պետք է պատրաստ լինենք դրան։ Խաղաղություն ես ուզում՝ պատրաստվիր պատերազմի»,-ասել էր Լավրովը։
Ավելի ուշ ՌԴ մամուլի քարտուղար Դմիտրի Պեսկովը, մեկնաբանելով Լավրովի հայտարարությունը, նշել էր, որ ԶԼՄ-ները խեղաթյուրել են վերջինիս խոսքերը։
«Այնուամենայնիվ, ԶԼՄ-ներն առանց համատեքստի ներկայացնում են այս սենսացիոն վերնագիրը, և դա ԶԼՄ-ների կողմից մեծ սխալ է, որը փոխում է խոսքերի իմաստը։ Իմաստն այն է, որ մենք դա չենք ուզում, մենք ցանկանում ենք զարգացնել հարաբերությունները Եվրամիության հետ, բայց եթե Եվրամիությունը գնա այդ ճանապարհով, ապա այո, մենք պատրաստ կլինենք։ Քանի որ պետք է պատրաստ լինել վատագույնին»,- լրագրողներին ասել էր Պեսկովը։
Այս շաբաթ Բրյուսելում հայտարարել են, որ կարող են նոր հակառուսական պատժամիջոցներ սահմանել։ Դա տեղի է ունեցել Եվրոպական դիվանագիտության ղեկավար Ժոզեպ Բորելի՝ Մոսկվա կատարած այցից հետո։ Նրա կարծիքով՝ Ռուսաստանը «չի արդարացրել սպասումները» և «չի դարձել ժամանակակից ժողովրդավարական պետություն»։
Վերջին շրջանում ԵՄ-ի և ՌԴ-ի հարաբերությունների լարվածության պատճառ է դարձել ռուս ընդդիմադիր Ալեքսեյ Նավալնիի ձերբակալությունը և հունվարի 23-ին և 31-ին բողոքի ակցիաների ժամանակ ցուցարարների ձերբակալությունները։