Սահմանափակումները, որոնք իշխանությունները կիրառում են, նպաստում են ապատեղեկատվության տարածմանը. Աստղիկ Ավետիսյան

Սահմանափակումները, որոնք իշխանություններն կիրառում են, նպաստում են ապատեղեկատվության տարածմանը, հանգեցում են պետական մարմինների և ԶԼՄ-ների չհամագործակցմանը, նաև երկրում տեղի են ունենում բազաթիվ գործընթացներ, սահմաններին հստակ խնդիրներ կան արձանգրված և եթե դրանք լրատվադաշտում օբյեկտիվ քննության չենթարկվեն, նոր խնդիրներ կարող են առաջանալ:

Այսօր Tert.am-ի հետ զրույցում նման կարծիք հայտեց Հայկական PR ասոցիացիայի նախագահ, ԵՊՀ ժուռնալիստիկայի ֆակուլտետի դոցենտ Աստղիկ Ավետիսյանը` խոսելով այն սահմանափակումների մասին, որոնք ԱԱԾ-ն կիրառում է լրատվամիջոցների նկատմամբ՝ Սյունիքում իրադարձություններ լուսաբանելու համար:

Ավետիսյանը նշեց, որ վերջին ամիսներին՝ գնալով առավել շատ են սահմանափակվում լրատվամիջոցների հնարավորությունները, իրավունքները, ազատությունը: «Ընդհանրապես, իշխանությունները հաղորդակցական խոչընդոտների պատճառով սխալ աշխատանքային ոճ են որդեգրել: ԶԼՄ-ների հնչեցրած հարցերին արագ և հստակ պատասխաններ չեն տրվում, արձագանքները հապաղում են, ինչը ևս լուրջ խնդիրների առաջ է կանգնեցնում ոչ իրազեկ հասարակությանը»,-ասաց նա և հավելեց, որ այս սահմանափակումները տանում են նրան, որ ավելանում է ապատեղեկատվության տարածումը, քանի որ, եթե լրագրողը չի կարողանում ստանալ տեղեկությունն, ապա փորձում է իր լսածով որևէ բան գրել, նկարագրել:

«ԱԱԾ-ն լրատվամիջոցներին պետք է հիմնավորի, թե ինչու է սահմանափակումներ կիրառում՝ անվտանգության տեսանկյունից է իրականացվո՞ւմ, եթե այո, Սյունիքում անվտանգ չէ, ապա սյունեցիների համար ի՞նչ իրավունքներ են սահմանված անվտանգության տեսանկյունից: Պետք է նախ դա պարզաբանեն, հետո ներկայացնեն, թե ինչո՞ւ է լուսաբանման գործընթացը երկարացվում. որոշակի փաստաթղթերի, փուլերի միջով պետք է անցնի լրատվամիջոցը, որպեսզի հասնի այն վայրը, որտեղ պետք է: Արտակարգ իրավիճակներ լուսաբանող լրագրողներն իրենց իրավունքները և պարտականությունները շատ լավ գիտեն, բայց այս գործելաոճով ստեղծվում են խոչընդոտներ, որոնք զրկում են լրատվամիջոցին օպերատիվ արձագանքելու հնարավորությունից»,- ընդգծեց նա:

Հայկական PR ասոցիացիայի նախագահի խոսքով՝ պետք է նաև հաշվի առնել, որ այս տարբերակը կարող է խթանել ապատեղեկատվության տարածմանը, քանի որ նույն իրադարձության կենտրոնում, երբ լուսաբանող լրագրող չկա, բնակիչը կարող է իր հեռախոսով նկարահանել, իր մեդիառեսուրսն օգտագործել և դա պարզապես ուղարկել լրատվամիջոցներին:

«Ի՞նչ է այս դեպքում շահելու պետությունը և ԱԱԾ-ն ինչպես է իրականացնելու իր վերահսկողությունը: Այսինքն, իր բան ու գործը թողած՝ պետք է յուրաքանչյուր տեսանկարահանող քաղաքացու հետևից գնա և հասկանա, թե որտեղից տարածվեց նտվյալ տեղեկատվությունը: Սրանով նպաստում են ոչ որակյալ բովանդակության ստեղծմանը, իսկ սա առաջին հերթին ձեռնտու չէ հենց իշխանությանը, որովհետև հանգիստ կարող է կեղծ տեղեկատվությունը տարածական դառնալ, որի հետևից գնալ պարզապես հնարավոր չէ, հնարավոր չէ նաև տարածված և բազմապատկված ապատեղեկությունը հերքել»,- շեշտեց Ավետիսյանը:

Դիտարկմանը, թե այս օրինակով՝ իշխանականների կողմից առաջ բերված օրենքի նախագծերը մեկը մյուսին հակասում են, այսինքն, նախ անանուն աղբյուրին հղում անելն է արգելվում, հետո նաև խախտվում է արտակարգ իրադարձությունների պարագայում շտապ Սյունիք հասնելու իրավունքը, որը անորակ տեղեկության տարածման կարող է հանգել, Ավետիսյանը պատասխանեց, որ վերջին տարիների ընթացքում համոզվում ենք, որ օրենքի չմշակված, չհստակեցված նախագծերը դառնում են օրենք և ավելի ու ավելի ոչ բարենպաստ մթնոլորտ են ստեղծում այն լրատվամիջոցների համար, որոնք պատշաճ իրականացնում են իրենց աշխատանքը:

«Այս օրենքներն ավելի շատ սահմանափակում են պատշաճ լրատվամիջոցների աշխատանքը, քան կանխարգելում են Telegram-յան ալիքների տարածած տեղեկատվությունները: Անանուն հղմամբ տեղեկության հրապարակումն, ամեն դեպքում, յուրաքանչյուր լրատվամիջոցի համար անքակտելի է, ինչը պետք է պահպանել: Այս դեպքում նաև դա է խախտվում և լրատվամիջոցը լուրջ խնդիրների առաջ է կանգնում»,- ամփոփեց Ավետիսյանը: