ՀՌՀ դասախոսները և ուսանողները համալսարանի հիմնական մասնաշենքի առջև իրականացնում էին հանրահավաք՝ հաջակցություն բուհի ռեկտոր Արմեն Դարբինյանի

Հայ- ռուսական համալսարանի դասախոսները և ուսանողները համալսարանի հիմնական մասնաշենքի առջև իրականացնում էին հանրահավաք՝ հաջակցություն բուհի ռեկտոր Արմեն Դարբինյանի, ում հանդեպ գործող վարչակազմի կողմից իրականացվում են ճնշումներ:

Բուհի պրոռեկտորն իր ելույթում նշեց, որ իրենք հավաքվել են իրենց անհանգստությունն արտահայտելու Արմեն Դարբինյանի անձի շուրջ ստեղծված վերջին իրադարձությունների վերաբերյալ, քանի որ դա վերաբերում է նաև համալսարանի ապագային.

«Նա, տարիներ շարունակ համալսարանը ղեկավարվելով, ապացուցել է, որ կառուցող ղեկավար է, նրա գործունեությունը միայն գովեստի է արժանի եղել և նման մթնոլորտի ձևավորումը անհարգալից է ոչ միայն ռեկտորի անձի նկատմամբ, այլ անհարգալից է համալսարանի կոլեկտիվի համար: Մենք կանգնելու ենք մեր ռեկտորի կողքին և թույլ չենք տալու անարդար վերաբերմունք համալսարանի ապագայի և ռեկտորի նկատմամբ: Կոլեկտիվի իրավունքների ոտնահարում մենք ոչ մեկին թույլ չենք տալու»:

Հայ-ռուսական համալսարանի ուսանողական խորհրդի նախագահ Արմինե Կիպելյանն իր ելույթում նշեց, որ հայ-ռուսական համալսարանի ուսանողների մեծամասնությունն իրենց անհանգստությունն են հայտնում համալսարանի ռեկտոր Արմեն Դարբինյանի անվան շուրջ շրջանառվող վերջին իրադարձությունների վերաբերյալ, ընդգծելով, որ հայ-ռուսական համալսարանն իր գործունեության բոլոր տարիներին եղել է ապաքաղաքականացված՝ խրախուսելով ակադեմիական ազատությունը.

«Մենք՝ ուսանողներս, խորին անհանգստություն ենք հայտնում նաև ԿԳՄՍՆ-ի՝ կրթության և գիտության, ինչպես նաև Հայաստանի Հանրապետության բուհերի, նրանց գործունեության և բուհերի կառավարման գործընթացում ուսանողների և ուսանողական կառույցների ներգրավվածության մասին նոր օրինագծերի վերաբերյալ: Մենք համոզված ենք, որ քաղաքականությունը կրթօջախներում տեղ չունի: Կրթական հաստատությունները և ուսանողական կառույցները պետք է առաջնորդվեն՝ հիմք ընդունելով միայն ակադեմիական ազատությունը՝ զերծ մնալով քաղաքական ուժի ազդեցությունից»:

Հիշեցնենք, որ Արմեն Դարբինյանը հայտարարել էր, որ Նիկոլ Փաշինյանն իր աշխատակազմի ու Կրթության, գիտության, մշակույթի և սպորտի նախարարության զգալի ուժերը լծել է իրեն «պաշտոնանկ անելու անբովանդակ նպատակի իրագործմանը։

Նշենք նաև, որ ԿԳՄՍ նախարար Վահրամ Դումանյանն էլ Ազգային ժողովում անդրադառնալով Սլավոնական համալսարանի ռեկտորի հայտարարություններին, նկատել էր, որ փակագծերը բացելու կարիք կա։ Պնդելով, որ թե՛ նախարարությունը եւ թե՛ Կառավարությունը Դարբինյանի պաշտոնանկությանը հասնելու որեւէ գործընթաց չեն սկսել՝ նրան հորդորել էր խնդիրը փնտրել այնտեղ, որտեղ կա։