Ֆրանսիայում պարետային ժամն օգուտ չի տվել. երկրում գրանցվել է նոյեմբերից ի վեր մեկ օրում կորոնավիրուսով վարակման դեպքերի առավելագույն ցուցանիշը
Չորեքշաբթի օրը Ֆրանսիան հաղորդել է կորոնավիրուսի մոտ 27 000 նոր հաստատված դեպքի մասին, որն ամենամեծ մեկօրյա ցուցանիշն է նոյեմբերի կեսերից ի վեր, այն դեպքում երբ երկիրը գտնվում է երկրորդ «լոքդաունի» մեջ: Այս մասին հայտնում է Reuters լրատվական գործակալությունը:
Երկրի առողջապահության նախարարության տվյալներով՝ մեկ օրում Ֆրանսիայում հայտնաբերվել է 26 784 դեպք, ինչի հետևանքով հիվանդացության դեպքերի թիվը եվրոպական երկրում հատել է 3,1 միլիոնի սահմանը:
Իշխանությունները ներկայում քննարկում են ավելի խիստ սահմանափակումների հնարավորությունը:
Այս պահին երկրում պարետային ժամը գործում է երեկոյան 18:00-ից առավոտյան 6:00-ն, բայց տվյալներն արձանագրում են հոսպիտալացումների և մահերի աճ:
«Տվյալները ցույց են տալիս, որ ներկայում պարետային ժամը բավարար չի զսպում վիրուսի տարածումը»,- հայտարարել է երկրի առողջապահության նախարարության մամուլի խոսնակը:
Ըստ նրա՝ քննարկվող տարբեր սցենարները տատանվում են ստատուս-քվոյի պահպանման և շատ խիստ մեկուսացման միջև:
Ֆրանսիայում արդեն փակ են ռեստորանները, բարերը, թանգարանները, լեռնադահուկային հանգստավայրերը, իսկ դպրոցները դեռ շարունակում են բաց մնալ: Խանութները նույնպես մնում են բաց, բայց ներսում գործում են այցելուների քանակի որոշակի սահմանափակումներ:
Նշենք՝ երկրում կորոնավիրուսային վարակից արդեն իսկ մահացել է 74 456 մարդ: