Պաշտոնյա. Հայաստանում ռուսական հեռուստաալիքներին նոր պահանջներ են առաջադրվել

Եթե նախկինում ազդեցության լծակներ չունեինք Հայաստանում ռուսական հեռուստաալիքներին հեռարձակման վրա, ապա ՌԴ կառավարության հետ նոր պայմանագրի կնքումից հետո նման լծակներ են հայտնվել: Այս մասին լրագրողների հետ հանդիպմանն ասաց Հեռուստատեսության եւ ռադիոյի հանձնաժողովի նախագահ Տիգրան Հակոբյանը:

Նրա խոսքով՝ այդ լծակները կկիրառվեն ռուս գործընկերների հետ համատեղ: Նա պարզաբանեց, որ այժմ ռուսական հեռուստաալիքներին նոր պահանջներ են առաջադրվել՝ հարգանք դրսեւորել Հայաստանի կամ հայ ժողովրդի համար հիշատակի ամսաթվերի հանդեպ (օրինակ, սգո օրերին չհեռարձակել ժամանցային ծրագրեր), չմիջամտել Հայաստանում ընտրական գործընթացներին, հարգել արտակարգ կամ ռազմական դրության նորմերը, բացառել կոնտենտի հեռարձակումը, որը նվաստացնում է հայերի ազգային արժանապատվությունը եւ այլն: «Բացի այդ, այսօր Հայաստանի Հանրայի հեռուստատեսությունը եզակի լիցենզիա է ստացել եւ կարող է առանց հավելյալ պահանջի հեռարձակել ռուսական մալուխային ցանցում: Այսինքն՝ առավելությունները ոչ թե միակողմանի են, ինչպես նախկինում, այլ երկկողմանի»,-հավելեց Հակոբյանը:

Արտասահմանյան հեռարձակողը, ինչպես պարզաբանեց Հակոբյանը, չի կարող մասնակցել լիցենզիա ստանալու մրցույթին, սակայն հնարավորություն ունի հեռարձակման մասին միջպետական պայմանագիր կնքել, ինչպես դա տեղի ունեցավ «Միր» հեռուստաալիքի հետ: «Ինչ վերաբերում է CNN-ին, ապա դա ոչ պետական ալիք է (ԱՄՆ-ում նման բան ընդհանրապես չկա), ուստի այդ ալիքի հետ անհնար է հեռարձակման մասին միջպետական պայմանագիր կնքել»,-եզրափակեց Տիգրան Հակոբյանը:

Փետրվարին Հայաստանում ռադիոհաճախականությունների մրցույթ կանցկացվի: Ըստ Տիգրան Հակոբյանի «Աուդիովիզուալ մեդիաների մասին» օրենքը ազատականացրել է նաեւ այս ոլորտը, ինչի շնորհիվ մրցույթին մասնակցության հայտերի քանակը շատ մեծ է: Հակոբյանը պարզաբանեց, որ ընդհանուր առմամբ հեռարձակման ոլորտն «Աուդիովիզուալ մեդիաների մասին» օրենքի ընդունման շնորհիվ էապես ազատականացվել է:

«Դա վերաբերում է նաեւ լիցենզիա ստանալու համար մրցույթին մասնակցության սահմանափակումների վերացմանը, ինչպես նաեւ տուրքերի 50-60 անգամ կրճատմանը (նախկինում հանրապետական ​​մուլտիպլեքսի համար տարեկան վճարի չափը 100 միլիոն դրամ էր): Ազատականացվել է նաեւ ցանցային օպերատորների ոլորտը, պարզեցվել է լիցենզիա ստանալու կարգը, կատարելագործվել է հեռուստաընկերությունների մոնիտորինգի համակարգը», - շեշտեց նա: