Թրամփն իրավաբանների թիմ է հավաքում Սենատում իր դեմ իմփիչմենթի գործով լսումների նախաշեմին
ԱՄՆ նախկին նախագահ Դոնալդ Թրամփը իրավաբանների հետ սկսել է քննարկել Սենատում իր նկատմամբ իմփիչմենթի գործով լսումների շրջանակում պաշտպանության ռազմավարությունը: Այս մասին հայտնել Է CNN հեռուստաալիքը։
Հեռուստաալիքի աղբյուրների տեղեկություններով՝ նախկին նախագահը մինչև հիմա չի կողմնորոշվել իրավաբանների թիմի կազմի հարցում: Սակայն վերջին մի քանի օրերին Թրամփը պաշտպանության ռազմավարությունը սկսել է քննարկել փաստաբան Բուտչ Բաուերսի հետ, որը, CNN-ի աղբյուրների համաձայն, արդեն համաձայնել է Սենատում ներկայացնել Թրամփի շահերը:
Բաուերսի թեկնածությունը, որը փաստաբանական գործունեություն է ծավալում Կոլումբիա քաղաքում (Հարավային Կարոլինայի նահանգ), խորհուրդ է տվել հանրապետական սենատոր Լինդսի Գրեմը, որն այդ նահանգը ներկայացնում է Կոնգրեսի վերին պալատում: CNN-ի տեղեկություններով՝ Գրեմը շարունակում է իրավաբաններ որոնել, որոնք կզբաղվեն ԱՄՆ-ի նախկին առաջնորդի պաշտպանությամբ։
Նշենք, որ օրերս Թրամփի անձնական փաստաբան Ռուդոլֆ Ջուլիանին հայտարարել էր, որ պաշտոնանկության ընթացակարգի շրջանակներում չի կարող պաշտպանել նախկին նախագահին, քանի որ պաշտոնապես այդ գործով վկա է:
Ավելի վաղ հաղորդվել էր, որ դեմոկրատները ԱՄՆ Սենատ են ներկայացրել նախկին նախագահ Դոնալդ Թրամփի պաշտոնանկության մասին բանաձևը, որը նախքան այդ հաստատվել էր Ներկայացուցիչների պալատում:
Հոդվածը, որի հիման վրա ընդունվել է բանաձևը «ապստամբության դրդումն է»: Իմփիչմենթի գործով լսումները կսկսվեն փետրվարի 8-ին: Նշենք, որ պաշտոնանկության ընթացակարգը սկսվել է հուվարի 6-ին Թրամփի աջակիցների կողմից Կոնգրեսի շենքը գրավելուց հետո։ Իմփիչմենթի աջակիցների կարծիքով՝ Թրամփը, գտնվելով նախագահի պաշտոնում, իրեն թույլէ տվել այնպիսի արտահայտություններ, որոնք նրա աջակիցներին դրդել են գրոհել Կոնգրեսի շենք ու այնտեղ անկարգություններ իրականացնել: