«Տնօրենի մրցույթում գործող տնօրենն ու այլ թեկնածու հավաքել են հավասար ձայներ, պահանջում ենք՝ մեր տնօրենը շարունակի պաշտոնավարել»․ N 1 ավագ դպրոցի անձնակազմը բողոքի ակցիա էր անում և նամակ հանձնեց ԿԳՄՍՆ (տեսանյութ)
Խ․ Աբովյանի անվան թիվ 1 ավագ դպրոցի անձնակազմը բողոքի ակցիա էր անում ԿԳՄՍ նախարարության շենքի դիմաց։ Պատճառը դպրոցի տնօրենի ընտրության հետ կապված խնդիրներն են։
Ուսուցիչները պահանջում էին, որ իրենց դպրոցի գործող տնօրենը շարունակի պաշտոնավարել, սակայն, ինչպես ուսուցիչներից մեկը որակեց, ինչ-որ մեկը եկել ու ուզում է ներխուժել իրենց կոլեկտիվ:
Նշենք, որ նոր տնօրենն ընտրվել է մրցույթով, սակայն ըստ ուսուցիչների՝ կատարվածն անարդար է, քանի որ մրցույթից կես ժամ առաջ հայտնվել է նոր թեկնածու և 8 հոգանոց անձնակազմից 4-ն ընտրել են նոր թեկնածուին, իսկ մյուս 4-ը՝ գործող տնօրենին:
Ուսուցիչների պնդմամբ՝ նոր թեկնածուին ընտրող 4 անձիք կապ ունեն Կոտայքի նախկին մարզպետ Ռոմանոս Պետրոսյանի հետ: Ըստ մրցույթի կարգի՝ ընտրության հավասար ձայների դեպքում արդեն ԿԳՄՍՆ-ն պետք է ընտրի տնօրենին, և ուսուցիչները պայքարում են հենց գործող տնօրենի համար:
Ուսուցիչներից մեկը նշեց, որ ԿԳՄՍ նախարարի հետ հանդիպում են պահանջում, որ երեք օրվա մեջ խնդիրը լուծվի, չլուծվելու դեպքում բոյկոտ կսկսեն: «Եթե նոր տնօրենը գա, փակ դռների առաջ է կանգնելու, ո՛չ մասնագետներ է ունենալու, ո՛չ աշակերտներ, որտե՞ղ է աշխատելու»:
Նշենք, որ այս պահին ուսուցիչները ԿԳՄՍՆ շենքում են և հանդիպում են պահանջում կա՛մ ԿԳՄՍ նախարարի, կա՛մ այլ ներկայացուցչի հետ:
Ուսուցիչներն իրենց դիմումը չհանձնեցին ԿԳՄՍ նախարարություն՝ հույս ունենալով, որ նախարարն իրենց կընդունի և իրենց հուզող հարցերը դիմումի հետ կփոխանցեն:
Ակցիայի մասնակիցներից 6 հոգի ԿԳՄՍՆ շենքում հանդիպման են հրավիրվել։