Անկարայի հարաբերությունները բոլոր հարեւանների հետ վատացել են Էրդողանի կառավարման օրոք. Կիպրոսի ԱԳՆ

Կիպրոսի արտաքին գործերի նախարար Նիքոս Քրիստոդուլիդեսը քննադատել է Թուրքիային Կիպրոսի ափերի մոտ էներգառեսուրսների հետախուզության ժամանակ «հրազենային նավերի դիվանագիտության օգնությամբ սեփական շահերը առաջ տանելու համար»:

Էր Ռիադ կատարած այցի ժամանակ Arab News-ին տված հարցազրույցում Քրիստոդուլիդեսը հայտարարել է, որ բոլոր հարեւանների հետ Անկարայի հարաբերությունները վատացել են նախագահ Ռեջեփ Էրդողանի կառավարման օրոք: «Երբ նախագահ Էրդողանն առաջին անգամ ընտրվել էր, Թուրքիայի հարաբերություններն ուրիշ երկրների հետ բոլորովին այլ էին: Թուրքիան չուներ խնդիրներ հարեւանների հետ»,-ասել է նախարարը: «Սակայն վերջին ութ տարվա ընթացքում ամեն ինչ փոխվել է: Այսօր Թուրքիան ունի խնդիրներ բոլոր հարեւանների հետ: Միեւնույն ժամանակ մենք չենք կարող փոխել աշխարհագրությունը: Մենք չենք կարող փոխել մեր հարեւաններին: Սակայն մենք ի վիճակի ենք եւ պատրաստ ենք քննարկել բոլոր հարցերը բանակցությունների սեղանի շուրջ»:

Քրիստոդուլիդեսը հայտնել է, որ Կիպրոսը ստորագրել է ծովային սահմանների մասին համաձայնագիր Եգիպտոսի, Լիբանանի եւ Իսրայելի հետ միջազգային իրավունքի եւ ծովային իրավունքի մասին ՄԱԿ-ի 1982 թվականի կոնվենցիայի հիման վրա, սակայն երբ երկիրը խնդրել է Թուրքիային քննարկել եւ համաձայնեցնել ծովային գոտիները, Անկարան հրաժարվել է: «Ինչո՞ւ են նրանք հրաժարվում բանակցություններ վարել ԵՄ եւ ՄԱԿ-ի անդամ Կիպրոսի հետ»:

Քրիստոդուլիդեսն այցելում է Սաուդյան Արաբիա եւ ԱՄԷ: Նրա այցի հիմնական նպատակներից է տարածաշրջանային անվտանգության քննարկումը, այդ թվում՝ հանդիպումը սաուդցի իր գործընկեր Ֆեյսալ բին Ֆարխանի հետ: «Մենք դիտարկել ենք՝ ինչպես կարող ենք ընդլայնել մեր համագործակցությունը, քանի որ անվտանգությունը բոլորիս համար խնդիր է»,-ասել է Քրիստոդուլիդեսը: «Մենք քննարկել ենք տարածաշրջանային համագործակցության ընդլայնման միջոցները ոչ միայն ԱՄԷ-ի եւ Սաուդյան Արաբիայի հետ, այլ նաեւ Եգիպտոսի եւ Հունաստանի հետ»,-ասել է նա՝ հավելելով, որ տարածաշրջանում համախոհ երկրները հավաքվում են միասին, որպեսզի հակազդեն մարտահրավերներին եւ քննարկեն տնտեսական ու ներդրումային հնարավորությունները, որոնք մենք ունենք»: