Փաշինյանի ծրագրերն ավելի շատ են, քան գրանցած արդյունքները. Независимая Газета
Ռուսական Независимая Газета-ն հոդված է հրապարակել, որում անդրադարձել է Նիկոլ Փաշինյանի բազմաթիվ ծրագրերին և ցուցաբերած ցածր արդյունքներին:
Հոդվածում մասնավորապես նշվում է, որ Նիկոլ Փաշինյանը ՀՀ կառավարության նիստի ընթացքում նախանշել է 2022 թվականի մակրոտնտեսական հարցերի շարք: Նա այս տարին անվանել է Հայաստանի տնտեսական հավակնությունների վերականգնման տարի:
«2020 թվականը շատ դժվար տարի էր, այդ թվում ՝ տնտեսապես, պատերազմի և համավարակի պատճառով: Մենք պետք է ձևակերպենք այն միջոցառումները, որոնք մեզ թույլ կտան հաղթահարել դժվարությունները», - ասել է Փաշինյանը՝ բացելով նախարարների կաբինետի նիստը: Նրա խոսքերով՝ անհրաժեշտ է վերականգնել իրավիճակը, որը Հայաստանում զարգացել էր մինչ Ղարաբաղյան երկրորդ պատերազմը:
«Մենք պետք է հստակ հայտարարենք, որ 2021 թվականը շրջադարձային կլինի ... Սա կլինի մեր տնտեսական հավակնությունների վերականգնման տարի»,-ասել է Փաշինյանը:
Նա ընդգծել է, որ երկիրը բախվում է բազմաթիվ տնտեսական մարտահրավերների, բայց դրանց հետ մեկտեղ կան բազմաթիվ հնարավորություններ:
«Իհարկե, առաջին հերթին պետք է կենտրոնանալ մարդասիրական խնդիրների լուծման վրա: Մյուս կողմից, պետք է փաստենք, որ հունվարի 11-ին Մոսկվայում ստորագրված եռակողմ հայտարարությունը և դրա հնարավոր իրականացումը կարող են Հայաստանի Հանրապետության համար ստեղծել բոլորովին նոր տնտեսական հնարավորություններ: Մենք մտադիր ենք լիովին օգտվել այդ հնարավորություններից, կրկնում եմ, ոչ միայն վերականգնելու մեր տնտեսական հավակնությունները, այլ նաև ավելի բարձր չափանիշներ հաստատելու համար»,-ասել է Նիկոլ Փաշինյանը:
Նա նշել է, որ 2021-ին իրականացված ծրագրերի որակը ազդեցություն կունենա 2022-ի մակրոտնտեսական համատեքստում, և անհրաժեշտ է, որ հետևողական լինի ծրագրի իրականացման բարձր արդյունավետությունը, և համաձայնվել է Հայաստանի ֆինանսների նախարար Ատոմ Ջանջուղազյանի հետ, որը ներկայացրել է 2022-ի տնտեսական զարգացման ընդհանուր կանխատեսումները և նշել է, որ համաճարակի հետևանքների և Ղարաբաղում պատերազմի պատճառով, ցանկալի է հնարավորինս շուտ սկսել քննարկել բյուջետային գործընթացը:
Վերլուծաբան Աշոտ Մելիքյանը պարբերականի հետ զրույցում նշել է, որ Փաշինյանի կառավարման տարիներին հավակնոտ տնտեսական նախագծերն ավելի շատ են եղել, քան իրական արդյունքները:
«Իհարկե, ազդել են համավարակը և Ղարաբաղյան երկրորդ պատերազմը: Բայց ոչ միայն: Դեր է խաղացել նաև կառավարությունում պրոֆեսիոնալիզմի պակասը և պետական կառավարման ոլորտում փորձի պակասը: Կադրային որոշ փոփոխություններ հուսադրող չեն: Ուստի չի բացառվում, որ տնտեսական նոր հավակնությունները կրկին միայն բարի նպատակներ մնան: Հատկապես, եթե հաշվի առնենք, որ Փաշինյանի թիմի առջև ծառացել է մեկ այլ շատ լուրջ մարտահրավեր՝ ներքաղաքական ճգնաժամը և դրա հետ կապված հասարակության հույզերի թեժացումը»,- ասել է Մելիքյանը պարբերականի հետ զրույցում:
Նրա խոսքերով ՝ ընդդիմությունը մտադիր է առավելագույնս օգտագործել ռազմական պարտության գործոնը՝ գործող իշխանությանը հեռացնելու համար: Այս քաղաքական պայքարը և երկրում կայունության վերականգնումը Փաշինյանից կպահանջեն նաև հսկայական ուժեր և ռեսուրսներ, որոնք կարող էին ուղղվել հետպատերազմյան Հայաստանի սոցիալ-տնտեսական կարիքներին:
«Ինչ վերաբերում է արտաքին տրանսպորտային հաղորդակցությունների ապաշրջափակմանը, որի շուրջ պայմանավորվել էին Ռուսաստանի, Հայաստանի և Ադրբեջանի ղեկավարները հունվարի 11-ին Մոսկվայում կայացած հանդիպմանը, ապա ներկայումս դրական հույսերը կարող են լինել միայն տեսականորեն: Իլհամ Ալիևի ռազմատենչ հայտարարությունները նույնիսկ հաղթանակից հետո, ռազմագերիներին և խաղաղ բնակիչներին «բոլորը բոլորի դիմաց» սկզբունքով վերադարձնելու համառ չկամությունը, այս հարցում Մոսկվայի անբավարար միջնորդական գործունեությունը լրջորեն խոչընդոտում է բոլոր մյուս խնդիրների, այդ թվում `տրանսպորտային խնդիրների լուծման համար պայմանների ստեղծմանը»,-ասել է Աշոտ Մելիքյանը: