ԱԱԾ-ի հայտարարությունը, թե Արարատ Միրզոյանը գործակալ չի եղել, անիմաստ էր. կառույցը գործակալին հաստատելու կամ չհաստատելու որևէ պարտավորություն չունի. Տիգրան Աթանեսյան
ԱԱԾ-ն որևէ պարտավորություն չունի իր գործակալին հաստատելու կամ չհաստատելու համար, ԱԱԾ-ի այն հայտարարությունը, թե Արարատ Միրզոյանը գործակալ չի եղել, կատարյալ անիմաստ է: Այս մասին այսօր Tert.am-ի հետ զրույցում ասել է փաստաբան Տիգրան Աթանեսյանը՝ անդրադառնալով ԱԺ նախագահ Արարատ Միրզոյանի` գործակալ չլինելու մասին ԱԱԾ-ի հայտարարությանը:
«ԱԱԾ-ն իրավունք ուներ չմեկնաբանելու և դա լրիվ նորմալ է գործակալական աշխատանքի դեպքում: Բայց ամեն դեպքում, եթե մեր երկրի երկրորդ դեմքը հանդիսանում է թուրքական գործակալ, ապա այսօրվա ազգային աղետի մեջ, հաստատ, թուրքական կողմի համար անուրանալի ներդրում է ունեցել, որովհետև սա նշանակում է՝ որևէ պետական գաղտնիք, որը հասու է ԱԺ նախագահին, փաստորեն գաղտնիք չի եղել նաև և՛ Թուրքիայի և՛ Ադրբեջանի համար»,-ասել է նա և շեշտել, որ անգամ աղետալի է այն, որ ԱԺ նախագահը կասկածվում է թուրքական գործակալ լինելու մեջ:
Ըստ Աթանեսյանի՝ Միզորյանի թուրքական գործակալ լինելու մասին շատ դժվար է նաև հստակ իմանալ անգամ իրավական ճանապարհով, որովհետև իրավական ճանապարհն սա է՝ ԱԺ-ն քննիչ հանձնաժողով ստեղծի, հատուկ օրենք ընդունի և գաղտնազերծի Արարատ Միրզոյանի մասին տեղեկությունները, որովհետև, եթե տարածված տեղեկությունը ճիշտ է, ուրեմն ԱԱԾ-ում փաստեր կան և՛ թուրքական և՛ ՀՀ ԱԱԾ գործակալ լինելու մասով, սակայն նրա որակմամբ՝ ծիծաղելի կլինի, որ ԱԺ-ն այս ուղղությամբ քայլեր ձեռնարկի:
«Այս դեպքում տեղեկության տրամադրման պարտականություն պետությունը չունի»,- ասաց նա։
Անդրադառնալով խոսակցություններին, որ Միրզոյանի օգնականը դեռ 2019 թվականին իր ֆեյսբուքյան էջում գրել էր, թե ԱՄՆ ներկայացուցիչների պալատի անդամ Ֆրենկ Փալոունն Արցախում է և հողերը հանձնելուց առաջ վերջին անգամ ցույց են տալիս տարածքը, Աթանեսյանը պատասխանել է, որ հիմար կատակ էր, որն ինչքան էլ նորմալ չէր, ամեն դեպքում ուշադրություն դարձնել պետք չէ:
Փաստաբանը ընդգծել է նաև, որ եթե անգամ Արարատ Միրզոյանի թուրքական գործակալ լինելը հաստատվի, շատ դժվար է բացահայտել, թե երբևէ ինչ տեղեկություններ են փոխանցվել թշնամուն, պարզապես, ըստ հետևանքների, կարելի է ենթադրել:
Հիշեցնենք, որ երեկ Սուրբ Աթոռում ՀՀ նախկին դեսպան Միքայել Մինասյանը բացահայտել էր, որ Արարատ Միրզոյանը թուրքական գործակալ է, և նշել էր, որ ՀՀ ԱԱԾ-ում, այդ մասին իմանալուց հետո, Միրզոյանին առաջարկել են համագործակցել նաև ՀՀ ԱԱԾ-ի հետ։
Միքայել Մինասյանը հրապարակել էր փաստաթուղթ, որում Միրզոյանը գրել է, որ տալիս է իր համաձայնությունը աջակցել ՀՀ ԱԱԾ-ին: