Բանակը վերականգնելու համար առնվազն 2-3 տարի պետք է, այդ ընթացքում չկա որևէ հիմար, որը պատերազմ կսկսի․ Վազգեն Մանուկյան
Բանակը վերականգնելու համար առնվազն 2-3 տարի պետք է, և այդ ընթացքում չկա որևէ հիմար, որը կսկսի ռազմական գործողություններ։ Այս մասին այսօր՝ հունվարի 16-ին, Վանաձորում քաղաքացիների հետ հանդիպմանը հայտարարեց «Հայրենիքի փրկության» շարժման միասնական թեկնածու Վազգեն Մանուկյանը:
«Երբեմն ասում են, որ եթե Նիկոլը գնա և ուրիշները գան, վերսկսվելու է պատերազմը: Ոչ, ո՞վ է այս բանակով վերսկսելու պատերազմը: Նախ ասեմ, որ Հայաստանը և Արցախը երբեք պատերազմ չեն նախաձեռնել: Բայց, եթե պատերազմ եղել է, մենք կարողացել ենք ջարդել ու գնալ առաջ՝ մինչև վերջին պատերազմը: Նույն էլ պետք է լինի հետագայում: Մենք պատերազմ հրահրող չենք, բայց մենք դիմադրություն ենք ցույց տալու, թույլ չենք տալու, որ մեր շահերը ոտնահարեն: Բանակը վերականգնելու համար առնվազն 2-3 տարի պետք է, և այդ ընթացքում չկա որևէ հիմար, որը կսկսի ռազմական գործողություններ: Բանակ պետք է ունենաս, որից կվախենան, առանց դրա պետություն լինել չի կարող»,- նշեց նա։
Ըստ Վազգեն Մանուկյանի՝ Հայաստանը վերջին ու կես տարում սխալ դիվանագիտություն է վարել Ռուսաստանի, Չինաստանի եւ Իրանի հետ՝ մասնավորապես Ռուսաստանի եւ նրա ղեկավարի արժանապատվությունը գրգռելով, Չինաստանի դեմ ուղղված ալյանս ստորագրելով։
«Այս ամենը արվում էր, որ դուր գայինք ԱՄՆ-ին, բայց ի՞նչ շահեցինք՝ ոչինչ, կորցրեինք ամեն ինչ, ուրիշի խաղի խաղալիք դարձանք։ Հիմա Թուրքիան տանում է ագրեսիվ քաղաքականություն Միջերկրական ծովի էներգետիկ ռեսուրսների վերաբերյալ։ Թուրքիայի թշնամին էլ մեր բարեկամը պետք է լինի ոչ թե որովհետեւ մենք թուրքերին չենք սիրում, այլ քաղաքական մաթեմատիկան է պահանջում այդ բանը»,- ասաց նա։
Ավելի վաղ հայտնել էինք, որ հունվարի 16-ին Վազգեն Մանուկյանն ու Շարժման ներկայացուցիչները կայցելեն Վանաձոր, որտեղ կհանդիպեն վանաձորցիների հետ և կքննարկեն երկրում ստեղծված իրավիճակն ու հետագա անելիքները։