«Բարգավաճ Հայաստանը» հանդիպել է ԲԴԽ անդամի թեկնածու Գագիկ Ջհանգիրյանի հետ․մանրամասներ

«Բարգավաճ Հայաստան» խմբակցությունը հունվարի 15-ին հանդիպել է Բարձրագույն դատական խորհրդի անդամի թեկնածու Գագիկ Ջհանգիրյանի հետ։ Այս մասին NEWS.am-ի հետ զրույցում ասել է խմբակցության քարտուղար Արման Աբովյանը։

«Հանդիպումն անցել է աշխատանքային նորմալ մթնոլորտում։ Թույլ տվեք չբարձրաձայնել այն հարցերի ցանկը, որոնք մենք քննարկել ենք, որովհետեւ հանդիպումը փակ էր, կարող եմ ասել, որ բոլոր այն հարցերը, որոնք այսօր հուզում են հանրությանը՝ բարձրաձայնվել են»,- ընդգծեց նա։

Հարցին, թե խմբակցությունն արդեն որոշում կայացրե՞լ է, թե ինչպես կքվեարկի Գագիկ Ջհանգիրյանի օգտին, Արման Աբովյանն ասաց, որ միայն հանդիպման արդյունքները քննարկելուց հետո խմբակցությունը որեւէ որոշում կկայացնի։

Ըստ Արման Աբովյանի՝ հանդիպմանը «Բարգավաճ Հայաստանը» ամբողջական կազմով չի ներկա եղել, որովհետեւ պատգամավորներից ոմանք մարզային այցելություններ են անցկացնում։

Հիշեցնենք, որ Գագիկ Ջհանգիրյանի թեկնածությունը ԲԴԽ անդամի պաշտոնում առաջադրել է իշխող «Իմ քայլը» խմբակցությունը։ Նախորդ օրերին Ջհանգիրյանը հանդիպումներ է ունեցել նաեւ «Իմ քայլի» եւ «Լուսավոր Հայաստան» խմբակցությունների հետ։