Բրիտանացին պատահաբար դեն է նետել 287 միլիոն դոլար արժողությամբ բիթքոիններով կոշտ սկավառակը
Ուելսի Նյուպորտ քաղաքի բնակիչ Ջեյմս Հովելսը, որը պատահաբար աղբամանն է նետել ընթացիկ փոխարժեքով 210 միլիոն ֆունտ ստեռլինգ (մոտավորապես 287 միլիոն դոլար) արժողությամբ բիթքոին պարունակող կոշտ սկավառակը, ցանկանում է գտնել այն քաղաքային աղբանոցում և կրիպտոարժույթի արժեքի 25%-ը (մոտավորապես 71,5 մլն դոլար) փոխանցել կորոնավիրուսի դեմ պայքարի տեղի հիմնադրամին, գրում է ՏԱՍՍ գործակալությունը:
2009-ին Հովելսը գրեթե չնչին գումարով գնել է 7,5 հազար բիթքոին: 2013-ին, գրասենյակի ընդհանուր մաքրման ժամանակ, նա պատահաբար դեն է նետել կոշտ սկավառակը, որի վրա պահվում էր կրիպտոարժույթը: Այն ժամանակ նրա բիթքոինների արժեքը հասել էր արդեն 7,5 միլիոն դոլարի:
Հովելսի խոսքով՝ ինքը մի քանի անգամ դիմել է Նյուպորտի իշխանություններին կոշտ սկավառակը որոնելու թույլտվություն ստանալու համար, բայց ամեն անգամ մերժում է ստացել: 2017 թ., երբ կրիպտոարժույթի արժեքը կտրուկ աճել է, և բիթքոինների արժեքն արդեն մոտավորապես 125 միլիոն ֆունտ ստեռլինգ (171 միլիոն դոլար) էր, սեփականատերը առաջարկել է հայտնաբերման դեպքում 10% փոխանցել իշխանություններին, բայց կրկին մերժում է ստացել:
Այժմ նա հայտարարել է, որ պատրաստ է իր առաջարկը հասցնել 25%-ի:
«Ներկայիս փոխարժեքով սա կազմում է շուրջ 52,5 միլիոն ֆունտ ստեռլինգ, և ես կցանկանայի դրանք նվիրել Նյուպորտ քաղաքի բնակիչների համար կորոնավիրուսի դեմ պայքարի հիմնադրամին», - ասել է Հովելսը:
Քաղաքային իշխանությունները պատմել են, որ Հովելսն առաջին անգամ իրենց է դիմել սկավառակը դեն նետելուց մի քանի ամիս անց:
«Վարչակազմը բազմիցս ասել է նրան, որ որոնումը հնարավոր չէ, քանի որ մենք սահմանափակված ենք մեր արտոնագրի պայմաններով, և պեղումը էապես կանդրադառնա շրջակա միջավայրի վրա, - բացատրել է պաշտոնյան: - Աղբավայրում պեղումների և այլ աշխատանքների արժեքը կարժենա մի քանի միլիոն ֆունտ, և երաշխավորված չէ, որ սկավառակը կգտնվի կամ կաշխատի»: