Քաղաքագետը նշել է Հայաստանի ընդդիմության թույլ տեղերը
Հայաստանի քաղաքական կյանքը պառակտված է, չկա հեղինակավոր առաջնորդ, որին ամբողջ հանրությունը կընդունի, եւ այս ֆոնին կա երկու գործոն, որոնք նպաստում են ներկայիս իշխանության վորարտադրմանը. ապատիա ու ատելություն: Այս մասին հունվարի 14-ին լրագրողների հետ հանդիպմանն ասաց քաղաքագետ Էդգար Էլբակյանը:
Նա նշեց, որ այսօրվա ապատիան առաջացել է պատերազմից հետո համացանցում իշխանամետ խմբերի քարոզչության հետեւանքով՝ տեղեկությունների դրական չափաքանակ տալու միջոցով կամ էլ այն թեզի առաջմղման միջոցով, որ եթե Սերժ Սարգսյանը մնար, ապա միեւնույն է՝ Արցախը հանձնելու էին:
«Եվ երբ լինում է հակառակ տեղեկատվությունը, ապա մարդիկ ընդհանրապես դադարում են հավատալ ցանկացած բանի: Սա իշխանություններին ձեռնտու է: Մյուս կողմից՝ նրանց հակազդում է թույլ ընդդիմադիր թեւը, որը քարոզչության եւ տեխնոլոգիաների առումով չափազանց հետ է մնում եւ գործում է 30-ամյա վաղեմության մեթոդներով: Դրանից բացի, ընդդիմությունն ինքը խոստովանել է, որ ժողովրդի հետ հաղորդակցությունը վատ է կատարվել, իսկ Վազգեն Մանուկյանն ընտրվել է փակ ռեժիմով: Ի տարբերություն դրա՝ 2018 թվականին Փաշինյանը հրապարակից հայտարարել էր, որ ինքը ժողովրդի թեկնածուն է: Դրանից բացի, 2018 թվականին Փաշինյանի թեզերը եւ հայտարարությունները ժողովրդին ավելի հասկանալի էին, քան այն, ինչ բարձրաձայնում է այսօրվա ընդդիմությունը: Սա կարեւոր է քաղաքական ընկալման տեսակետից»,- հավելեց Էլբակյանը: