ԱՄՆ դատախազները հայտարարում են, որ Հոնդուրասի նախագահը օգնել է թմրանյութեր տեղափոխել Ամերիկա
ԱՄՆ դաշնային դատախազները հայտարարում են, որ Հոնդուրասի նախագահ Խուան Օրլանդո Էրնանդեսը թմրավաճառին օգնել է հազարավոր կիլոգրամ կոկաին տեղափոխել ԱՄՆ՝ հսկայական կաշառքի դիմաց, հայտնում է CNN-ը:
Նյու Յորքի Հարավային շրջանի դատախազների կողմից ներկայացված միջնորդագիրը պարունակում է նոր ապացույցներ թմրավաճառ Ջիովանի Ֆուենտես Ռամիրեսի դեմ գործով, այդ թվում՝ ցուցմունքներ 2013-ին եւ 2014-ին Ֆուենտեսի եւ Էրնանդեսի կողմից ենթադրյալ գործարքների ու խոստումների մասին:
Հոնդուրասի նախագահը միջնորդագրերում անունով նշված չէ: Նա հիշատակվում է որպես «CC-4»: Ֆերնանդեսին մեղադրանք չի առաջադրվել: 2019-ին նա հաստատել է, որ իր հանդեպ հետաքննություն է վարում ԱՄՆ-ի թմրամիջոցների դեմ պայքարի վարչությունը, եւ բազմիցս հերքել է բոլոր մեղադրանքները:
Ֆուենտեսը 2020 թվականի հունիսին իրեն առաջադրված մեղադրանքները չի ընդունում, հաղորդում է CNN Español-ը:
Դատական փաստաթուղթը նկարագրում է Ֆուենտեսի եւ Էրնանդեսի սերտ աշխատանքային հարաբերությունները: Այն պնդում է, որ Էրնանդեսը, ի թիվս Հոնդուրասի այլ բարձրաստիճան պաշտոնյաների, կաշառք է վերցրել, երբ առաջադրվել է նախագահի պաշտոնում 2013թ., իսկ դրա դիմաց առաջարկել է ռազմական աջակցություն եւ օգտագործել երկրի զինված ուժերը թմրանյութերի տարածման գործողությունների համար: «Մոտավորապես 2013 եւ 2014 թվականներին «CC-4»-ը խոստացել է պաշտպանել [Ֆուենտեսին] ձերբակալությունից եւ արտահանձնումից, խոստացել է օգնել ամբաստանյալին կոկային տեղափոխել Հոնդուրասի զինված ուժերի օգնությամբ, եւ հայտարարել է, որ ինքը պատրաստվում է «թմրանյութերը խցկել հենց գրինգոյի քթի մեջ»,- ասվում է փաստաթղթում:
Twitter-ում տեղադրված հայտարարության մեջ Հոնդուրասի նախագահը հերքել է մեղադրանքները որպես «100% կեղծ»՝ դատախազության վկաներին որակելով որպես «ճանաչված հանցագործներ», ովքեր ստել են «վրեժ լուծելու եւ իրենց պատժաչափերը կրճատելու համար»: