Մադուրոն հայտարարել է, որ Թրամփը ցանկանում էր ոչնչացնել Վենեսուելան եւ իրեն սպանել
Վենեսուելայի նախագահ Նիկոլաս Մադուրոն հայտարարել է, որ ամերիկացի գործընկեր Դոնալդ Թրամփը իր կառավարման տարիներին ցանկանում էր ոչնչացնել Վենեսուելան եւ իրեն սպանել, փոխանցում է ՏԱՍՍ-ը:
«Իշխանության լինելու չորս տարիների ընթացքում Դոնալդ Թրամփի գլխավոր թիրախը Վենեսուելան էր: Մեզ եւ ինձ ոչնչացնելը: Նա մի քանի անգամ հրամայել է ինձ սպանել»,- ասել է Մադուրոն կիրակի Կարակասում ելույթ ունենալիս: Նրա ելույթը հեռարձակվել է պետական հեռուստատեսությամբ:
Վենեսուելայի նախագահը կարծում է, որ Թրամփը «համաշխարհային քաղաքականության մեջ առավելագույն ատելության, բռնության եւ ագրեսիայի» մարմնացումն է:
Վենեսուելայում իրավիճակը սրվել էր, երբ 2019 թվականի հունվարի 23-ին ընդդիմության առաջնորդ Խուան Գուայդոն, որի նշանակումը խորհրդարանի խոսնակի պաշտոնում դրանից 2 օր առաջ չեղարկել էր Գերագույն դատարանը, իրեն հայտարարել էր նախագահի պաշտոնակատար: Նրան պետության ժամակավոր ղեկավար էր ճանաչել ԱՄՆ-ն, որին միացել էին Լիմայի խմբի երկրները (Մեքսիկայի բացառությամբ), Ամերիկյան պետությունների կազմակերպությունը եւ Եվրամիության անդամների մեծ մասը: Մադուրոն տեղի ունեցածն անվանել էր հեղաշրջման փորձ եւ հայտարարել ԱՄՆ-ի հետ դիվանագիտական հարաբերությունների խզման մասին: Նրա աջակցությամբ էին հանդես եկել Ռուսաստանը, Բելառուսը, Իրանը, Չինաստանը, Կուբան, Նիկարագուան, Սիրիան եւ Թուրքիան: