Ինդոնեզիայում կործանված ուղևորատար Boeing-ը թռիչքի պահին հայտնվել է ուժեղ տուրբուլենտության գոտում

Ինդոնեզիայում կործանված Boeing 737-524 օդանավը թռիչքի մեկնարկի պահին անցնել է ամպրոպի միջով և հայտնվել է ուժեղ տուրբուլենտության գոտում: ТАСС գործակալության փոխանցմամբ՝ այս մասին լրագրողներին հայտնել է երկրի օդերևութաբանության, կլիմայի և երկրաֆիզիկայի գործակալության ներկայացուցիչ Դենի Սեպտիադին:

«Արբանյակներից ստացված տեղեկությունների համաձայն՝ թռիչքի պահին 15 կմ շառավղով մեծ ամպամածություն, ուժեղ ամպրոպ և տեղումներ են նկատվել: Բացի այդ, այդ պահին տվյալ շրջանում գտնվող բոլոր ինքնաթիռները պետք է ուժեղ տուրբուլենտության միջով անցնեին»,- ասել է գերատեսչության ներկայացուցիչը:

Հիշեցնենք, որ ինդոնեզական Sriwijaya Air ավիաընկերությանը պատկանող օդանավը նախօրեին կործանվել է Ջակարտայից Պանտիանակ ուղևորվելիս և ընկել Ճավայի ծովը: Նախնական տեղեկություններով՝ օդանավում 65 մարդ է գտնվել, 53 ուղևոր, որոնց թվում՝ 10 երեխա, և անձնակազմի 12 անդամ:

Ավելի վաղ հաղորդվում էր, որ մասնագետներին հաջողվել է գտնել օդանավի սև արկղերը: Զոհվածների մարմինները նույնպես որոնվում են: