Ամստերդամը կարգելի թեթեւ թմրանյութերի վաճառքը զբոսաշրջիկներին
Ամստերդամը կարգելի թեթեւ թմրանյութերի վաճառքը այլ երկրներից ժամանող զբոսաշրջիկներին: Այս մասին ուրբաթ օրը հայտարարել է քաղաքի ղեկավար Ֆեմկե Հալսեման, որի խոսքերը մեջբերում է Նիդեռլանդական ռադիոհեռուտատեսային հեռարձակող ընկերությունը:
«Իհարկե, ծրագիրը վաղը կյանքի չի կոչվի, կարծում եմ՝ կտեւի մոտ մեկ տարի»,- ասել է նա: Դատախազության եւ ոստիկանության աջակցությամբ, այս նախաձեռնության համաձայն, թեթեւ թմրանյութերի վաճառքը կթույլատրվի միայն երկրի բնակիչներին, հաղորդում է ՏԱՍՍ-ը:
Վերջին 20 տարիների ընթացքում Ամստերդամում փակվել է 117 եւ 283 սուրճի խանութներ՝ հաստատություններ, որտեղ թույլատրվում է թեթեւ թմրանյութերի վաճառքը, ինչպիսին է մարիխուանան: Սակայն դրանց պահանջարկը միայն մեծացել է, առավելապես օտարերկրյա զբոսաշրջիկների պատճառով, որոնց թիվը քաղաքում մինչ համավարակը անընդհատ աճում էր: «Մենք դիտում էինք, թե ինչպես են ավելի ու ավելի շատ երիտասարդներ գալիս Ամստերդամ՝ հատուկ կոֆեշոփեր այցելելու համար»,- ասել է Հալսեման: Նա նաեւ մատնանշել է տարբեր ուսումնասիրությունների արդյունքները, որոնք ցույց են տալիս, որ շատ օտարերկրյա զբոսաշրջիկներ կհրաժարվեն Ամստերդամ ժամանել, եթե չկարողանան այցելել հաստատություններ, որտեղ թույլատրվում է թեթեւ թմրանյութերի վաճառքը:
Քաղաքապետը դեռ չի քննարկել այս հարցը սուրճի խանութների սեփականատերերի հետ եւ առաջին փուլում ցանկանում է այն ներկայացնել քաղաքի խորհրդի անդամների քննարկմանը: Նախկինում քննարկվել են նման գաղափարներ՝ միայն Նիդեռլանդների բնակիչներին թեթեւ թմրանյութերի վաճառքը թույլատրելու վերաբերյալ: Սակայն բոլոր նման նախաձեռնությունները մերժվել են այն մտավախության պատճառով, թե արգելքը կհանգեցնի նրան, որ առեւտուրը կդառնա անօրինական եւ կտեղափոխվի փողոց: Հալսեման խոստովանել է, որ նման ռիսկ կա, բայց նշել է, որ շատերն Ամստերդամ են գալիս ոչ միայն թեթեւ թմրամիջոցներ գնելու, այլ հենց սուրճի խանութներ այցելելու համար:
Կորոնավիրուսի համավարակի պատճառով Ամստերդամում զբոսաշրջությունը գրեթե ամբողջովին վերացել է, եւ Հալսեման հույս է հայտնել, որ դրա ավարտից հետո քաղաքը կսկսի ավելի շատ գրավել այլ կատեգորիայի զբոսաշրջիկների ուշադրությունը: «Մենք կցանկանայինք, որ մեզ մոտ գային մարդիկ, ովքեր հետաքրքրված են մեր մշակութային հաստատությունների գեղեցկությամբ եւ հարստությամբ,- ընդգծել է նա,- Ոչ թե այն զբոսաշրջիկները, ովքեր գալիս են այստեղ ալկոհոլ եւ թմրանյութեր գտագործելու»: