Վերջին 2,5 տարվա ընթացքում մենք ականատես ենք լինում բացառիկ իրավիճակի՝ իշխանության կողմից ճնշումների արդյունքում բարձրացել է դատական իշխանության անկախության աստիճանը. սահմանադրագետ
Պատահական չէր, որ ընդհանուր առմամբ ԲԴԽ կազմում բազմաթիվ փոփոխություններ տեղի ունեցան, և գործող իշխող ուժը, ինչ եկել է իշխանության, փորձում էր ցանկալի և կառավարելի կազմով մարմին ձևավորել: Այս մասին Tert.am-ի հետ զրույցում ասաց սահմանադրագետ Գոհար Մելոյանը:
Նրա խոսքով, այս պարագայում ևս, իշխանությանը հաջողվեց Սահմանադրությամբ նախատեսված հերթական անկախ մարմինը յուրայիններով լցնել:
«Ըստ էության՝ մի շարք միջադեպերից կարելի է ենթադրել, որ ԲԴԽ անդամները որոշակիորեն զերծ են մնում օրենքով նախատեսված հստակ լիազորությունների կատարումից, քանի որ մենք այս երկուսուկես տարիների ընթացքում ականատես ենք եղել դեպքերի՝ օրինակ ձայնագրությունները, թե ինչպես են դատավորների վրա ճնշում գործադրելու փորձ կատարում: Հստակ ձայնագրություններ ի հայտ եկան, և ԲԴԽ-ն ընթացք չտվեց կամ որևէ առանձնահատուկ գնահատականի ականատեսը չեղանք»,- ասաց Գոհար Մելոյանը:
Նրա խոսքով` դեպքեր են եղել, երբ գործադիր իշխանության կողմից դատավորների նկատմամբ ակնհայտորեն ճնշում է իրականացվել իշխանության համար ոչ ցանկալի որոշումների կամ դատական ակտերի կայացման հարցում:
«Oրինակ` Ռոբերտ Քոչարյանի հետ կապված վարույթում գտնվող գործերի շրջանակում, կամ դատավոր Ազարյանի դեմ տարատեսակ ճնշումների և ոչ ցանկալի գործընթացների ականատեսը եղանք, կամ դատավոր Դավիթ Գրիգորյանի հետ կապված այդ խայտառակ պատմությունը, երբ իրավապահ մարմինները մտել էին անգամ դատավորի աշխատասենյակ ու ինչ-որ վարույթային գործողություններ կատարել ու քրեական դատավարության մի շարք նորմեր խախտել: Ակնհայտ էր, որ այս ամենը քաղաքական պատվերի շրջանակում է իրականացվում»,- ասաց սահմանադրագետը:
Նա ընդգծեց, որ ԲԴԽ առաքելությունը դատավորների գործունեության անկախության երաշխավորն է և պետք է կանխի նմանատիպ երևույթները, սակայն իշխանության այս ճյուղում տեսնում ենք քաղաքական պատվերներ ու միջամտություն:
«Սակայն ի պատիվ մի շարք արժանավոր դատավորների, ովքեր տոկունություն ցուցաբերեցին այս երկուսուկես տարվա ընթացքում, չկքվեցին իշխանության ճնշումների դիմաց: Ես որպես մասնագետ ինձ թույլ եմ տալիս հաստատել, որ ինչքան հետևել կամ ծանոթացել եմ դատական ակտերին, քաղաքական գործերի շրջանակում դատավորները հարյուր տոկսոսով փորձել են օրենքի տառին և իրենց խղճին հավատարիմ մնալ, չհաշված քաղաքական պատվեր կատարող դատավորները, որոնք գործող իշխանության սրտի դատավորներն են և նրանց հարցով պետք է զբաղվի ԲԴԽ-ն և համապատասխան գնահատական տա ու կարգապահական վարույթներ հարուցի»,- ասաց Մելոյանը:
Նրա խոսքով, վերջին 2,5 տարվա ընթացքում մենք ականատես ենք լինում բացառիկ իրավիճակի՝ իշխանության կողմից ճնշումների արդյունքում մեզ մոտ բարձրացել է դատական իշխանության անկախության աստիճանը:
«Կարելի է ասել, գրեթե ամբողջական անկախ դատական իշխանություն է ձևավորվում մեր երկրում, որովհետև մի շարք դատավորներ ընդառաջ չգնացին քաղաքական իշխանության ճնշումներին և հանրությանն ի ցույց դրեցին, որ իրենք բացառապես անկախ գործող պաշտոնատար անձինք են և գործում են օրենքի տառին համապատասխան: Նաև շատ ողջունելի էր վերջերս ԲԴԽ նախագահի հայտարարությունը, որը կարելի է որակել որպես հաղորդագրություն՝ ուղղված հանրությանը, որ իրենք էլ այսուհետ չեն տրվելուգործող քաղաքական ուժի ճնշումներին և կրկին գործելու են օրենքի տառին համապատասխան»,- ասաց Գոհար Մելոյանը: