Պարսից ծոցում վեճի ավարտը կլինի հաղթանակ տարածաշրջանի համար. Էր Ռիադ

Պարսից ծոցում վեճի ավարտը կլինի հաղթանակ տարածաշրջանի համար, CNBC-ին հայտարարել է Սաուդյան Արաբիայի արտաքին գործերի նախարարը Քաթարի եւ չորս արաբական երկրների միջեւ հարաբերությունների լիարժեք վերականգնման մասին հայտարարությունից հետո:

Երեքշաբթի Պարսից ծոցի երկրների համագործակցության խորհրդի ու Եգիպտոսի առաջնորդները ստորագրել են համաձայնագիր, որն ուղղված է միասնության եւ համախմբվածության ամրապնդմանը: Գործարքը կնքվել է ավելի քան երեք տարի հետո, երբ Սաուդյան Արաբիան, Արաբական Միացյալ Էմիրությունները, Բահրեյնն ու Եգիպտոսը սահմանել են առեւտրային եւ զբոսաշրջային արգելանք Քաթարի համար:

«Մենք համոզված ենք, որ հռչակագիրը լուծում է բոլոր չլուծված հարցերը, որոնք կարող էին ծագել կողմերի մոտ»,-հայտարարել է ԱԳ նախարար Ֆեյսալ բին Ֆարհան ալ Սաուդը:

Երկուշաբթի Սաուդյան Արաբիան բացել է օդային տարածքը, ցամաքային եւ ծովային սահմանները Քաթարի հետ:

Նախարարի խոսքով՝ այդ գործարքը կդառնա շատ ամուր հիմք հետագայում տարածաշրջանային կայունության համար: Հարցին՝ արդյոք դա Թրամփի վարչակազմի հաղթանակն էր, ալ Սաուդն ասել է. «Ես կարծում եմ, որ այդ համաձայնագիրը կդառնա հաղթանակ տարածաշրջանի, եւ առաջին հերթին, մեր բոլորի համար»:

Այդուհանդերձ, նա խոստովանել է ԱՄՆ-եի Քուվեյթի կողմից աջակցությունը, որոնք միջնորդ են եղել Սաուդյան Արաբիայի եւ Քաթարի միջեւ: «Անշուշտ, նախագահ Թրամփը եւ Սպիտակ տան ավագ խորհրդական Ջարեդ Քուշներն իրենց ներդրումն են ունեցել այդ համաձայնագիրը կնքելու հարցում՝ սերտորեն համագործակցելով Քուվեյթի հետ»,-ասել է նա:

«Այդ համաձայնագիրը չի վերաբերում Իրանին կամ մեկ ուրիշ երկրին: Խոսքը վերաբերում է մեր երկրները միավորելուն եւ համոզվելուն, որ մենք աշխատում ենք միասին մեր ժողովուրդների բարգավաճումն ու անվտանգությունն ապահովելու համար»: